زما قبله.. زما اقصى

سرليکنه

پر مسلمانانو له اوږدې مودې کفري او له کفري هېوادونو سره يو شمېر ملاتړو هېوادونو جغرافيايي، مذهبي، کلتوري او هراړخيز تېری پیل کړی دی، چې وخت په وخت د مسلمانانو د جذبې له معلومولو کفري هېوادونه په يوه او بل نوم يو يو ګام پورته کوي.

امريکا له مسلمانانو سره د دښمنۍ په تاريخ کې تر ټولو سخت ګام د تېر زېږديز کال د دسمبر د مياشتې په شپږمه پورته کړ، ټرمپ اعلان وکړ چې امريکا بیت المقدس رسماً د اسرائیلود پلازمېنې په توګه ومانه.

 له هغه مخکې چې ټرمپ د امريکا جمهوري رياست ته کانديد ؤ او کمپاين یې پیلاوه، يو شمېر د نظر خاوندانو وړاندوینه کړې وه چې ټرمپ به د امريکا په واکمنانو کې د مسلمانانو پر خلاف تر ټولو سخت مخالف واکمن وي.

هغه وخت هم فکر کېده چې ټرمپ به د مسلمانانو لپاره نور خطرناک قدمونه پورته کوي، چې دا دی د تېر کال له اعلان سره سم یې په بيت المقدس کې د خپل سفارت د پرانستې اعلان وکړ. فلسطيني مسلمانانو یې پر خلاف غبرګون وښود، پراخه مظاهرې یې وکړې چې د ٥٥  کفن پر سر شهيدانو تر څنګ ٢٧٠٠ فلسطيني مظاهره کوونکي هم ژوبل شول.

راپورونه وايي چې په ټول فلسطين کې د امريکا د دې بې شرمانه اقدام پر خلاف، چې د مسلمانانو په لومړۍ قبله بيت المقدس کې امريکا د خپل سفارت پرانسته وکړه، د غبرګون په ښوولو مظاهرې وشوې، چې يواځې په غزه کې د اسرائيلو لخوا د ٥٥ شهيدانو علاوه نور ٥٢ فلسطينې مظاهره کوونکي شهيدان شوي دي.

د مسلمانانو ستر دښمنان امريکا او اسرائيل په بيت المقدس کې د امريکا د سفارت په پرانیسته خوښ شول. هغه  هېوادونه چې له امريکا سره د يارانې په تار تړلي دي هغوی پرې چوپه خوله پاتې شول. خو د نړۍ د ټولو اسلامي هېوادونو د مسلمانانو، چې بيت المقدس یې لومړۍ قبله وه، د امريکا په دې اقدام له زړونو وينې وڅڅېدې.

په بيت المقدس کې د امريکا د سفارت د پرانستنې په غبرګون کې د فلسطيني مسلمانانو شهادت او تر  ٢٧٠٠ پورې ژوبلېدل د فلسطين په تاريخ کې يوه لويه غميزه ده، چې د فلسطين په لارو او کوڅو کې د فلسطيني مسلمانانو وينې يو ځل بيا د خپلو حقوقو څخه په دفاع وبهېدې.

په بيت المقدس کې د امريکا د سفارت پرانسته يوه غميزه نه ده چې لومړۍ قبله مو امريکا د اسرائيلو پلازمېنه رسما ومنله، دا د مسلمانانو لپاره دوه غميزې دي، يوه دا چې د مسملمانانو پر لومړۍ قبله تېری وشو، دویم دا چې لومړى عربي او بيا د نړۍ يو شمېر اسلامي هېوادونه پرې چوپ پاتې شول. تر ټولو دا لويه غميزه ده چې عربي هېوادونه ولې پرې چوپ شول.

د نړۍ مسلمانان په بيت المقدس کې د امريکا د سفارت په پرانسته په دې اندېښمن شول چې لومړۍ قبله کې یې امريکا سفارت جوړ کړ. خو د عربو لپاره اندېښنه نه ده، د هغوی لپاره مرګ دى چې امريکا او اسرایيلو یې پر خاوره تېری وکړ، يرغل یې پرې وکړ، بيت المقدس یې ترې ونيو، کور یې ترې ونيو، دين یې ترې ونيو، ذهن یې ترې ونيو او آن هېواد یې ترې ونيو.

 بيت المقدس د مسلمانانو لومړۍ قبله ده، خو د عربو خاوره ده. لکه څرنګه چې افغانان د امريکا د تېري په مقابل کې له خپلې خاورې دفاع کوي، لومړې یې بايد عربي هېوادونو دفاع وکړي. پر عربي هېوادونو یې دفاع فرض ده. موږ به یې د اسلاميت او لومړۍ قبلې پر بنسټ دفاع کوو.

افسوس، افسوس او بيا هم افسوس، چې د مسلمانانو پر لومړۍ قبله دې يرغل کېږي، عرب او د نړۍ نور اسلامي هېوادونه دې چوپه خوله ناست وي.

 په افغانستان کې لومړی د کمونستانو پر خلاف  د عربي نړۍ علماء د جهاد فتوا اسلام ته د خطر پر بنسټ ورکړه. هغه يوه داخلي کودتا وه، د ارضي تماميت د له منځه وړلو مسئله هم پکې نه وه، روسانو خو بيا وروسته تېری وکړ. دا اوس د عربو او بيا د اسلامي نړۍ هغه علماء چې په افغانستان کې یې د جهاد فتوا ورکوله، د امريکا او اسرایيلو پر خلاف ولې د جهاد په فتوا کې چوپ او خولې یې ګڼدلې دي؟

آيا فلسطين د مسلمانانو خاوره نه ده؟ ايا اسرائيل بيت المقدس کې د پلازمېنې او د مسلمانانو د شهيدانولو جواز لري؟ ايا بيت المقدس يواځې د فلسطيني مسلمانانو لومړۍ قبله وه؟ ايا په بيت المقدس کې د امريکا سفارت پرانیستل يواځې د فلسطينيانو سپکاوى دى؟ او آيا نوره به  د کفارو په مقابل کې د جهاد د فتوا دروازې تړلې وي  چې د عربو او نړۍ علماء یې د امريکا او اسرائيلو پر خلاف نه ورکوي؟

په بيت المقدس کې د امريکا د سفارت پرانیسته د مسلمانانو لپاره يوه ستره غميزه او دردوونکې ورځ ده. امريکا د ټولې اسلامي نړۍ سپکاوی وکړ. د فلسطين په خاوره کې پر بيت المقدس تېری (د اسرئيلو په رسميت پېژندل) پر ټوله اسلامي نړۍ تېری دى.

 کاش چې په عربانو کې د عربيت تر څنګ افغانيت هم واى، بيا به یې د امريکا او اسرائيلو يرغل ته سرونه نه وو ټيټ کړي؛ د افغان باشهامته ولس په څېر به یې د خپلې خاورې دفاع کوله.

کاش چې د عربو د علماوو په زړونو کې پر افغانستان د روسانو د تېري پر مهال هغه جذبه پاتې واى، اوس به یې د امريکا او اسرئيلو پر خلاف د جهاد فتوا ورکړې واى.

اسرایيلو به هيڅ وخت فلسطيني مسلمانان نه واى شهيدان کړي او امريکا به په بيت المقدس کې د خپل سفارت پرانستلو جرأت نه واى کړی که په دې غميزه د نړۍ په هر ګوټ کې مسلمانانو دا غږ کړی واى چې ”زما قبله..  زما اقصى! “

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close