سوله د افغان ولس او جګړه د امریکا وړاندیز

 سرلیکنه

د تیرې فبروري په میاشت کې اشرف غني د کابل پروسې په دویم کنفرانس کې طالبانو ته له قید او شرط پرته د سولې وړاندیز وکړ، چې طالبانو ته د اشرف غني پر وړاندیز اوس په افغانستان کې یو شمېر رسنۍ، ولسي جرګه، د سولې په نامه جوړه شورا او دفاع وزارت بیا بیا بحثونه کوي او طالبان ګرموي چې د سولې وړاندیز ته د هو ځواب نه ورکوي.

د سولې په نامه شورا خو په وار وار پر طالبانو غږ وکړ چې له دې فرصته ګټه پورته کړي او باید په افغانستان کې روانې جګړې ته نور د پای ټکی کېښوول شي.

دفاع وزارت پکې دا ټکی هم زیاتوي چې که وسله وال مخالفین سوله کوي، اسانتیاوې به ورته برابرې کړي.

 خو دا نه ده څرګنده چې څه ډول اسانتیا؟ تراوسه پورې ارګ د ځان لپاره د اسانتیاوؤ د برابرولو واک نه لري، د طالب مشرانو لپاره به د سولې په موخه څرنګه اسانتیا برابرې کړي؟

د امریکا یا افغانستان او جنوبي اسیا لپاره د ټرمپ په ستراتیژۍ کې په افغانستان کې سولې ته هیڅ ځای نه دی ورکړل شوی، ټول ټینګار پر جګړه شوی، ځکه امریکا او ناټو افغانستان ته د جګړې د دوام لپاره نور پوځونه رالېږي.

په هېواد کې د سولې په نامه شورا، ولسي جرګه، دفاع وزارت، قومي، سیاسي، طالبان، د جهادي ګوندونو مشران او ټول افغان ولس په یوه غږ د سولې غوښتونکي دی، او دا غږ یې تل پورته کړی دی. خو امریکا ده چې د جګړې وړاندیز او غږ کوي، او هم د جګړې د دوام لپاره افغانستان ته نور پوځونه رالېږي او د سولې لارې تړي.

له تېرو څلورو لسیزو راهیسې جګړې افغان ولس دومره وځاپه چې نور د ساه اخیستلو توان نه لري. غربي رسنۍ تبلیغوي چې طالبان په افغانستان کې جګړه کوي، طالبان هیڅ وخت جګړه نه کوي؛ نه یې غواړي او نه یې اراده لري. طالبان له خپل هېواد جګړه مار باسي او د خپل ولس دفاع له بهرنیو جګړه مارو کوي. طالبانو (افغان ولس) د سولې وړاندیز کړی او کوي یې. خو امریکا بیا د جګړې وړاندیز کوي او د جګړې د دوام لپاره زمینه سازي کوي.

دا ټولې نړۍ درک کړې ده چې افغان ولس سولې ته، خو امریکا جګړې ته چمتو ده، ځکه خو یې په افغانستان کې د بهرنیو پوځونو د پای ته رسېدلي جنګي ماموریت باوجود نور پوځونه راولېږل.

امریکا په افغانستان کې افغان ولس په هر نامه وواژه. په جوماتونو، ښارونو، جنازو، ودونو او آن په حکومتي پوستو کې یې پر افغان پولیسو بمبار وکړ. افغان ولس هیڅ وخت جګړه نه ده غوښتې؛ له جګړې بېزاره دی، په وار وار یې د سولې وړاندیز کړی، په خپل هېواد کې د سولې غږ پورته کوي. خو امریکا بیا د سولې نه، بلکې د جګړې وړاندیز کوي، د جګړې غږ پورته کوي او د جګړې د دوام لپاره شرایط برابروي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close