سيګار: لويه څارنوالۍ، عدلي او قضايي ارګانونو کې پراخ فساد موجود دی

(کابل ټکی کام، ۱۳۹۷، زمری ۱۰)

د افغانستان لپاره د امريکا د مرستو د څار اداره “سيګار” وايي، په لويه څارنوالۍ، عدلي او قضايي ارګانونو کې د فساد سربيره دغه څارنوالۍ د فساد په سترو دوسيو کې ناغيړي کړې او فسادګرو سره يې کمزوری چلند کړی.

سيګار وايي، افغانستان کې حکومت کمزوری، د دغه هېواد له وضعيت ښکاري چې د قانون واکمني پکې نشته، افغان ځواکونه د خپلې ولکې لاندې سيمو په ساتلو کې پاتې راغلي او حکومت د پراخ فساد پر وړاندې د مبارزې لېوالتيا نه لري.

سيګار زياتوي، د اداري فساد ډيرې قضې چې فسادګر اشخاص هم موجود دي د سياسي ادارې د نه شتون له امله پاتې دي او په ځانګړي ډول لوی څارنوال فريد حميدي د هغو فساد کوونکو اشخاصو په وړاندې کمزوری او ناقص چلند کوي چې زورواکي او نفوذ لرونکي دي.

سيګار د مرستندويه ادارو هغه اندېښنه پر ځای بللې چې په وينا يې د ملي يووالي حکومت يواځې د “کاغذپرمخ” د اداري فساد پر وړاندې د مبارزې ادعا کوي.

د سيګار راپور کې راغلي، په فساد کې د ککړو سل کسانو په نيولو کې د کورنيو چارو وزارت ناغيړې کړې، د سل کسانو “فساد کوونکو زورواکو” د جلب امر د هغوی له لوري له پامه غورزول شوی او کورنيو چارو وزارت يې په نيولو کې خپل مسئوليت نه دی ادا کړی.

دغه راز د سيګار راپور زياتوي، د اداري فساد پر ضد په عدلي او قضايي مرکز او د افغانستان د لویې څارنوالۍ د سترو جرمونو پر وړاندې د مبارزې په ادارې کې پراخ فساد موجود دی.

د روڼتيا نړيوال سازمان د ورستي راپور پر اساس چې د روان ۲۰۱۸م کال په فبرورۍ مياشت کې خپور شو افغانستان د نړۍ څلورم تر ټولو فاسد هېواد بلل شوی چې لومړی، سوماليا، سويلي سوډان، سوريه او څلورم افغانستان دی.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close