سي این این: په افغانستان کي د ټرمپ ستراتیژي ناکامه کېږي او طالبان ئې ګټي

واحد فقیري

د متحده ایالاتو د ستري تیلویزوني شبکې سیاسي تحلیلګر ښاغلی نیک پاټن د اکسټ پر ۱۷ مه باندي لیکي: که څه هم په افغانستان کي جنګ شدید سوی دئ،‌ خو سپینه ماڼۍ وايي،«امریکا متعهده ده چي د افغانستان د جنګ لپاره یوه سیاسي حللاره ومومي.»

نیک پاټن وايي په متحده ایالاتو کي د افغانستان جنګ په یو هېر سوي جنګ باندي بدل سوی دئ.«غرب په افغانستان کي د بري پر ځای د یو موجه اخراج په لټه کي دئ، او غواړي چي‌ د افغان له جنګه ځان راټول کړي.»

لیکوال زیاتوي کلونه کلونه متحده ایالاتو ټینګار کاوه چي طالبان باید د افغان حکومت سره مخامخ خبري وکړي،‌خو طالبانو تل غوښتل چي «د اشغالګرانو» سره مخامخ خبري وکړي. اوس امریکا د هغوی همدا غوښتنه منلې ده.

نیک پاټن کاږي موږ نه پوهېږو چي د امریکا او طالبانو تر مینځ خبري چیري رسېدلي دي، خو دونه پوهېږو چي اضافه مذاکرات راروان دي. او دا خبري په داسي‌ وخت کي کېږي چي طالبان په نظامي او سیاسي لحاظ د قوت په موضع کي دي. ځکه هغوی د خپلو اصلي غلیمانو (یعني امریکا او ناټو) سره خبري کوي.

لیکوال علاوه کوي څرګنده خبره ده چي د افغانستان د جنګ لپاره نظامي حل نسته، او د سپیني ماڼۍ د روغي جوړي پالیسي درسته ده. ځکه طالبان پوهېږي چي جنګ ئې ګټلی دئ، او غرب ستومانه سوی دئ.

بل پلو، په افغانستان کي بل جنجالي انتخابات راروان دي، او د دې خطر سته چي دا پارلماني انتخابات به د حکومت مشروعیت نور هم ور کمزوری کړي. په آخر کي، په داسي حال کي چي د افغانستان جنګ ۱۸ کلن کېږي، امریکا پدې نه پوهېږي چي ولي افغانستان ته ننوتله، او اوس هلته د پاته کېدو په اړه په زیاتېدونکې توګه شکمنه ده، او پدې هم نه پوهېږي چي د خپل مسلم خروج په پاي کي باید څه وکړي.

مایکل مالووف: «د غني نصب سوی حکومت به یوه هفته دوام و نه کړي»

د ویک ویب پاڼه پخپله سر مقاله کي د اګسټ پر ۱۷ مه باندي لیکي پداسي حال کي چي د متحده ایالاتو توجه پر داخلي مسایلو باندي متمرکز سوې ده، په افغانستان کي جنګ زور اخیستی دئ. پدې تېره هفته کي، د طالبانو او حکومت په نښتو کي په سلهاوو خلګ وژل سوي دي.

سر مقاله وايي د بي بي سي په اټکل طالبان د افغانستان په ۷۰٪ فیصده خاوره کي فعال حضور لري. د متحده ایالاتو د دفاع وزارت پخوانی تحلیلګر ښاغلی مایکل مالووف وايي که چیري همدااوس امریکا خپل عسکر له افغانستانه راوباسي، د امریکا په زور د اشرف غني نصب سوی حکومت به یوه هفته دوام و نه کړي.

سر مقاله ادامه ورکوي او کاږي په رویټرز کي ښاغلي پطر آپس لیکي،«لدې پس، د طالبانو ټول نظامي عملیات په عین حال کي هم نظامي او هم سیاسي اهداف لري. د طالبانو د دې هفتې نظامي عملیات د دې لپاره نه ول چي سیمي لاندي کړي، بلکي د هغوی د نظامي قابلیت او حضور ښکاروندی ول. پدې عملیاتو کي د طالبانو اساسي هدف پر روانو مذاکراتو باندي اغېزه ښندل ول.»
#DPolPost

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close