شاهین قول اردو: چورلکې لوېدو پېښه کې د یو بهرني په ګډون درې تنه وژل شوي

(کابل ټکی کام، ۱۳۹۷، وږی ۱۱)

چاراکي وايي، نن سهار د دفاع وزارت اړوند يوه قراردادي چورلکه له اور اخيستو وروسته نسکوره شوې او پکې د یوه بهرني په ګډون شپږ کسانو ته مرګ ژوبله اوښتې ده.

پېښه نن سهار وختي د شاهين قول اردو په ساحه کې د تخنيکي ستونزې د رامنځته کېدو له امله رامنځته شوې ده.

د شاهين قول اردو وياند محمد حنيف رضايي وايي، ياده الوتکه له کابل څخه بلخ ته راغلې وه او له شاهین قول اردو څخه د فارياب پر لور له پرواز څو شيبې وروسته نسکوره شوه.

د رضايي په وينا، په دغه الوتکه کې يو بهرنی او دوه نظامي منسوبين وژل شوي او درې تنه نور ټپيان دي.

نوموړی وايي، وژل شوی بهرنی تن د الوتکې پيلوټ و چې په پېښه کې د اور خوراک شو.

دا په داسې حال کې ده چې درې ورځې مخکې هم د نورستان ولايت په برګمټال ولسوالۍ کې د دفاع وزارت اړوند يوه اکمالاتي چورلکه نسکوره شوې وه.

دفاع وزارت وويل چې يادې چورلکې په برګمټال کې بيړنۍ ناست کړې خو طالبانو ادعا وکړه چې چورلکه د دوی د بريد په ترڅ کې نسکوره شوې او له عملې سره له منځه يوړل شوه چې ټوټې يې لا هم په سيمه کې پرتې دي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close