شپني عملیات که وحشي عملیات

آصف الله آصفی

هسې خو پر ملت له 17 کلونو غربي ناتار راکوز شوی او ورځ تر بلې پر دغه جنګ ځپلي ملت د مظالمو د لړۍ لمن پراخیږي، غربیان غواړي چې په تدریجي توګه دغه ملت غلام کړي، خو دا آرمان به ګور ته یوسي، د جبر او ظلم د دغې روانې لړۍ په پیر کې د څو اونیو راهیسې د ګډو ځواکونو لخوا پر جنګ ځپلي ملت د ظلم توره وریځ را ټیټه کړې، هیواودوال مو په خپلو سترګو وینې چې دغه سفاک ځواکونه چې د امریکایانو په لاس یې په همدې موخه ځانګړې روزنه شوې، څو څه ډول د دغه مظلوم ملت بچې د میندو په غیږو کې، هغه هم په خواږه خوب ویده پراته، په ډیر وحشت او بربریت سره ووژني.

هیوادوالو ولیدل چې د ننګرهار د خوږیاڼیو په وډیسار، اشپان، پیټلو او ځینو نورو سیمو کې او ورپسې د وردګو په جغتو او میدان ښار او د کاپیسا په تګاب ولسوالۍ کې په لسګونو بې ګناه او بې وزله غریب هیوادوال تنکي ماشومان او میرمنې په داسې حال کې په خپلو وینو کې ولمبول چې په خواږه خوب ویده وو.

ټولو خلکو ولیدل چې په دې ټولو عملیاتو کې 95 سلنه عام وګړي په شهادت رسیدلي دی، دا ډول عملیات دا معنی لري چې مزدور او اجیر رژیم او عسکر نور د طالبانو سره له مخامخ جګړې عاجز شوي دي؛ نو غچ یې له عامو بې وسلې خلکو تورسرو او تنکیو ماشومانو اخلي.

دا عملیات هغو عملیاتو ته ورته دي چې د کمونستانو د حکومت پر مهال کله چې د کمونستانو واک او ځواک مخ په ځوړ شو، همدغه ډول عملیاتو ته یې لاس واچاوه، چې بالآخره ټول ملت یې پر وړاندې عام پاڅون وکړ، د ملت ښځه او نر ستر او ماشوم ټولو ګاونډیو هیوادونو ته لومړی کډه شول او ورپسې یې د سفاک رژیم پر ضد تر هغې جګړې او قربانۍ ورکولو ته دوام ورکړ چې د روسانو اجیر وحشي او سفاک رژیم یې په ګونډو کړ.

د افغانستان ملت ته زیری ورکوم چې د دغو ګډو ځواکونو په واسطه د وحشت دغه ډول عملیاتو پراخیدل د ګوډاګي رژیم د پرځیدو ورځې رالنډوي، هغه ورځ لرې نه ده چې دغه لاسپوڅی او مزدور رژیم به د همدغه با ایمانه ولس په مټو ډیر زر نسکور کړای شي.

دې شپنويو عملياتو ته د وحشت عملیات ځکه ویلای شو چې څوک انسان وي او عقل ولري، هیڅکله له وچو سره لامده نه سوځوي، چې څوک انسان وي او وحشي نه وي؛ نو یو چرګ هم بې ګناه نه وژني، خو دا د خنزیرانو په غوښه ستر شوي غربیان او ورسره د څو ډالرو افغان نما مزدوران نه زمونږ پر تور سرو رحم کوي نه مو پر تنکیو په خواږه خوپ ویده ماشومانو؛ نو ځکه ویلای شو چې دا انسانان نه دي بلکې د انسانانو په شکل کې وحشي درنده ګان دي چي د همدې لپاره روزل شوي، څو د افغانانو نسل کُشي وکړي، کورونه یې ویجاړ کړي او په سپین میدان یې د غمونو په ټغر کینوي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close