صرافان: که امنيت يې خوندي نه شي؛ خپلې پانګې له افغانستانه اوباسي

(کابل ټکی کام، ۱۳۹۷، کب ۲۶)

 د کابل صرافانو ګواښ کړی که حکومت يې امنيت خوندي نه کړي دوی به له افغانستانه خپله ټوله پانګه نورو هيوادونو ته وليږدوي.

وروسته له هغې چې په کابل کې د يوه صراف لور د انسان تښتوونکو له لوري ووژل شوه، پرون په کابل کې صرافانو کاربنديز اعلان کړی و او د يوې غونډې په ترڅ کې يې پر حکومت ملامتي واچوله چې د امنيت په خونديتوب کې يې پاتې راغلی دی.

د کابل د صرافانو د اتحاديې مسؤولين وايي، د روان کال له پيله صرافان دوولس ځلې له قتل او تښتوونو سره مخ شوي چې حکومت د يادو دوسيو په اړه جدي اقدام نه دی کړی.

د صرافانو د اتحاديې مشر مير افغان صافي وويل، د شپږ کلنې مهسا قاتلين دې په ښکاره ډول اعدام شي، او ورته ډول د نورو جرمونو عاملين دې ژر تر ژره ونيول شي او قانوني سزا دې ورکړل شي.

د لویې څارنوالۍ وياند جمشيد رسولي وايي، د مهسا دوسيه د لويې څارنوالۍ تر څيړنې لاندې ده او د امنيتي ادارو سره په همغږۍ دغه دوسيه پرمخ وړل کيږي.

په وروستيو کې د افغانستان په ځينو لويو ښارونو کې د پانګوالو لپاره امنيتي وضعيت تر بل هرکله خراب شوی چې پانګوال يې په اړه اندېښمن کړي دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close