طالبانو! د خپلواکۍ ۹۹یمه کلیزه دې یوازې تاسې ته مبارک وي/ خالد روان

الله جل جلاله انسان ته ډېر نعمتونه ورکړي او یو نعمت یې ازادي هم ده. د ازادۍ په خوند هغه ملتونه ښه پوهېږي، چې د اسارت شپې یې تېرې کړې وي او د ازادۍ د گټلو لپاره یې سرښندنه کړي وي. د اسلام، خپلې خاورې، ناموس او د بهرنیو یرغلگرو پر وړاندې یې مبارزه کړي وي او بهرني یرغلگر یې ماتې منلو ته اړ کړي وي. هغه که د اوس وخت ځوانان دي او که زموږ د تاریخ تېر شوي خلک دي.

زموږ نېکمرغي یا بدمرغي داده، چې موږ ازادي اخیستې؛ خو ساتلې مو نه ده. له ننه پوره ۹۹ کاله مخکې په همدغه ورځ غازي امان الله خان له انگرېزانو ازادي واخیسته او برېتانوي هند افغانستان په رسمیت وپېژانده. دا هغه وخت و، چې لوی هند د انگرېزانو تر استعمار لاندې وو. له برېتانیې سره یوازې هند نه و، بلکې خپلې مستعمرې یې په امریکا، اروپا، اسټرالیا، اسیا او تر افریقا غځولې وې. د افغانانو له دې مېړانې وروسته په هند کې د ازادۍ اخیستلو روحیه پیاوړې شوه او له موږ یې ۲۹ کاله وروسته له برېتانیې څخه خپله ازادي واخیسته او تر ننه یې خپلې ازادي وساتله.

نن هندوستان په هر لحاظ د نړۍ یو پیاوړی هېواد دی. په تعلیمي ډگر کې خو ډېر پرمختللی او د نړۍ معتبر پوهنتونونه په هند کې هم شته. هند یوازې نه، بلکې پاکستان، بنگله‌دېش او له برېتانیې هغو ملتونو چې ازادي اخیستې، زموږ په پرتله ښه ژوند لري او بیا اشغال شوي نه دي.

افغانستان لا د برېتانیې ویجاړ شوي ځایونه رغولي نه وو، چې د امان الله خان پر وړاندې مبارزه پیل شوه او په پایله کې یو نامتو قطاع الطریق د واک پر گدۍ کېناست. د حبیب الله کلکاني شپږ میاشتنۍ دوره کې موږ بیا نیمه پېړۍ شاتگ وکړ او رغول شوي ځایونه بېرته وران ویجاړ شول. د ظاهرشاه او د داوود خان د واکمنۍ دورې نسبت ښې وې. که موږ ډېر پرمختگ ونه کړ، خو سوله حاکمه وه. د داوودخان واکمنۍ ته هم خلقیانو د پای ټکی کېښود او موږ یو ځل بیا یوې خونړۍ جگړې ته ورټېل وهل شو. د خلقیانو، کمونیستانو او پرچمیانو د نورو ظلمونو ترڅنگ یو ظلم دا هم وکړ، چې افغانستان یې د شوروي اتحاد په منگولو کې ورکړ او د روسانو وتل د میلیونونو افغانانو ژوند هم واخیست. یو ودان افغانستان په بشپړه کنډواله بدل شو او د خالص بابا خبره«چې مجاهدینو افغانستان ډېر ازاد کړ» او پایله یې کورنۍ جگړې او د پاټکیانو واکمن کېدل و، چې د تېر جهاد ټول برم یې تر پوښتنې لاندې راوست او نن هماغه مشران د امریکا پر دسترخوان ناست دي.

د انگرېزانو د خپلواکۍ ۷۰ کاله پوره شوي وو، چې د روسانو د وتلو ازادي هم ورسره غبرگه شوه. د طالبانو د واکمنۍ چې پنځه کاله پوره شول او روسانو د وتلو ۱۲ کاله پوره شوي وو، نو امریکا له ځان سره د نړۍ ۵۰ هېوادونه ملگري کړل او افغانستان یو ځل بیا د ټولې نړۍ له خوا  اشغال شو.

پوره اوولس کاله د امریکا او پلویانو پر وړاندې وسله واله مبارزه روانه ده او هره ورځ لسگونه افغان زلمیان خپلې ځوانۍ د امریکایانو پر وړاندې د مبارزې په لاره کې قرباني کوي. خو دغه مبارزه د روسانو او انگرېزانو سره توپیر لري. دلته هره ورځ افغانان قرباني ورکوي؛ خو د امریکا تالي څټي د افغانانو دغه پاڅون د «پنجابیانو» په نامه یادوي او زموږ دومره لویه قرباني نورو ته منسوبوي. افسوس.

نن له امان الله خان سره د امریکا تالي څټو هم یو ځای خپل انځورونه نښلولي او افغانانو ته د ازادۍ مبارکي ورکوي. په ښارونو کې داسې شعارونه لگېدلي، چې له ډېر درده دې ورته خندا راشي. که امان الله خان ژوندی وای، نو نن به یې د هغو سرونه هم پرې کړي وو، چې له امریکايي سفارت نه معاش اخلي او د روانې مبارزې کرېډيټ نورو ته ورکوي.

د افغانستان د ۹۹ کلیزې مبارکۍ د ورکړې حق یوازې طالبانو ته ورکول کېږي؛ ځکه دوی د نړۍ لوی طاقت ته غېږه ورکړې او پر وړاندې هر ډول قربانۍ ته چمتو ولاړ دي. د ازادۍ مبارکي ورکول د امریکايي تالي څټو ته د امان الله خان روح نارامه کول دي او هغه داسې خلکو سرونه وهل، چې د یرغلگرو په خوا کې ولاړ وو او د ازادۍ احساس یې نه لاره. نو طالبانو! د ازدۍ ۹۹یمه کلیزه مو مبارک شه!

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close