طالبانو د ولس پر قاتلانو عدالت پلی کړ

میوند سادات

دې وروستیو کې طالبانو د هغو قوماندانانو او جنرالانو وژلو ته کار ویلی چې سلګونه ولسي وګړي یې شهیدان او ټپیان کړي، دخلګوکورونه یې ویجاړ کړي او مالونه یې لوټ کړي دي.

د ۲۰۱۵ په مارچ کې د بشري حقونو د څارې ادارې (Human Rights Watch)دکابل حکومت اته تنه لوړپوړي چارواکي په جنګي او بشري جرمونو تورن کړل. د تورونو کسانو نومونه په لاندې ډول دي:

عطامحمد نور  دبلخ پخوانی والي،عبدالحکیم شجاعي په ارزګان کې داربکیانو قومندان،خیرمحمد تیمور د تخار پخوانی امنیه قومندان،حاجي نجیب الله  د تخار د ملي امنیت پخوانی رییس، اسدالله خالد د ملي امنیت پخوانی عمومي رییس،جنرال رازق د کندهار پخوانی امنیه قومندان،عزیز الله  کاروان پکتیکا کې داربکیانو پخوانی قومندان اومیرعالم د بغلان پخوانی امنیه قومندان.

د یادې شوې ادارې  همدا راپور دعیني شاهدانو، ژورنالیستانو او قومي مشرانو سره د ۱۲۵ مرکو پر بنسټ چمتو شوی. دبشري حقونو دڅار ډلې(هیومن رایس واچ) ویلي چې همدا کسان باید ونیول شي او د محاکمې مېز ته راکش کړل شي، خو د حامد کرزي او اشرف غني په مشري دکابل حکومت همدا یاد شوي مجرمان نه یوازي داچې محاکمه نه کړل، بلکې لایې پسې ونازول.

د یادو شوو جنګي مجرمانو له جملې څلور تنه یې طالبانو په نښه کړي.  اسدالله خالد په ۲۰۱۲ کال کې اوعزیزالله کاروان، جنرال رازق او حکیم شجاعي سږ کال په نښه شوي دي.

اسدالله خالد:

اسدالله خالد دملي امنیت عمومي ریس پاته شوی، خالد په غزني، کندهار او کابل کې ډیر ولسي وګړي بې محاکمې شکنجه او شهیدان کړي دي. دبشر دحقونو بېلابیلو ادارو نوموړی په جنګي جرمونو او اخلاقي فسادتورن کړی.خالد امریکایانو ته ډیر نژدې و، امریکایانو دکابل حکومت تر ډیرو چارواکو اسدالله خالد ترجیح ورکوله. په ۲۰۱۲ کال کې یو طالب سرتیري پر خالد برید وکړ، په دې بریدکې نوموړی سخت ژوبل شو، امریکایانو ددرملنې لپاره  لومړی باګرام او بیا امریکا ته یووړ، هلته یې د سپینې ماڼۍ دوخت واکمن اوباما او دفاع وزیر لېون پنیتاروغتون ته دپوښتنې لپاره ورغلل. خالد اوس هم له هماغو ټپونو کړیږي او له شدیدې روانې ناروغۍ سره لاس او ګرېوان دی.

عزیزالله کاروان:

عزیز الله کاروان پکتیکا کې دملېشو ځانګړې قطعه درلوده، همدا قطعه یرغلګرو اکمالوله، اهداف یې ورته په نښه کول او دشپې او ورځې یې پر مظلوم ولس ورمارش کوله. څو میاشتې وړاندې طالبانو کابل کې عزیزالله کاروان په یو غلچکي برید کې وواژه. دکاروان په وژلو سره ولس ډير خوشحال شو او دکاروان پلویان د ویر پر ټغر ور ټول شول.

جنرال رازق:

جنرال رازق دکندهار امنیه قوماندان او دسرحدي لېوا مشر و،نوموړ ی یرغلګرو ته ډير نژدې و،اشغالګرو دکابل حکومت د ډيرو غړو له منځه پر جنرال رازق  باور کاوه،یرغلګرو دجګړې پر مهال د رژیم دنورو جنرالانو په پرتله د جنرال رازق هوایې ملاتړ ته ډير ژر وردانګل. جنرال رازق چې له اشغالګرو سره څومره خوږ و، د خپل ولس سره همدومره تریخ و،شخصي زندانونه یې درلودل، جنګي اسیران  یې بې محاکمې شهیدانول، سیاسي او قومي حریفان یې ترور او اختطاف کول، ګمرکي محصولات یې خپل جېب ته اچول،جنرال رازق دکندهار ښار کې داسي وحشت خپور کړی و چې هره ورځ به دوکانداران، موټروانان، بزګران، تجاران، محصلین او طالب العلمان اختطاف کیدل او د څو ورځو او اونیو وروسته به یې په ریګونو او دښتونو کې مړي موندل کیدل.۲۷۶ تنه په قلم لیکل شوي هیوادوال یې  بې محاکمې شهیدان کړي او جسدونه یې غورځولي وو.بالاخره د روانې میلادي میاشتې په ۱۸مه طالبانوهمدا دمظلوم ولس قاتل مجازات کړ.

حکیم شجاعي:

شجاعي دارزګان ولایت په خاص ارزګان او ځینو نورو سیمو کې داربکیانو حکومت پلوه مشر و،د سیمه ییزو خلګو  په وینا شجاعي ۲۰۰ تنه بې دفاع ولسي وګړي شهیدان کړي. نوموړی د سولې شوری داوسني مشر کریم خلیلي په مشري دوحدت ګوند مهم غړی بلل کیده. تېره ورځ رسنیوخبر ورکړ چې دارزګان ولایت د خاص ارزګان ولسوالۍ په کندلان او جنګه ريغ سيمو کې د شجاعي په مشري داربکیانو او طالبانو ترمنځ نښته شوې، دخبرونو په حواله په نښته کې دشجاعي د مرستیال فکوري په ګډون ۲۰تنه اربکیان وژل شوي او شجاعي پکې ټپي شوی دی. نن بیا ځینو رسنیو خبر ورکړی چې شجاعي د ژورو ټپونو له امله ساه ورکړې. که دشجاعي وژل کیدل رښتیاشي ولس به ډير خوشحال شي.

طالبانو نویمه لسیزه کې هم  هغه قوماندانان تارومار کړل چې پر مظلوم ولس یې ظلمونه کول،اوس یو ځل بیا طالبانو دولس قاتلان راګیر کړي،د مظلوم ولس انتقام ځني اخلي او دعدالت غیږې ته یې سپاري. طالبان نو رهم باید دمظلوم ولس وژونکو او ځورونکو ته متوجه شي،دظلم مخه یې ونیسي او مجازات یې کړي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close