طالبان: امريکا دې د برتانيې له ماتې عبرت واخلي

(کابل ټکی کام، ۱۳۹۷، زمری ۲۸)

نن چې د زمري اته ويشتمه نيټه ده په ټول هېواد کې له انګريزانو د ازادۍ اخيستلو نهه نوي يمه کليزه لمانځل کېږي.

طالبانو هم په يوې اعلاميې کې له انګريزانو د ازادۍ اخيستلو د افغانانو قربانۍ او سرښندنې ستايلي او ټولو افغانانو ته يې د ازادۍ ورځې مبارکي ويلې ده.

خبرپاڼه زیاتوي، افغانانو د علماء کرامو، روحانيونو او بادرکو مشرانو په لارښونه د سرتاسري پاڅون په پايله کې پرنګي طاغوت ته په دريم ځل تاريخي ماتې ورکړه او د هيواد ملي او سياسي خپلواکۍ يې ترلاسه کړه.

طالبانو ويلي، موږ د بریتانوي استکبار په وړاندې د سپېڅلې مبارزې او استقلال په لاره کې د مجاهدو افغانانو کارنامو او سرښندنو ته د درناوي په وړاندې کولو سره خپل ميړني ولس ته له خوښيو ډکې پيرزوينې اهداء کوو او د دې وياړمنې ورځې د رارسيدو مبارکي ورته وايو

د خبرپاڼې له مخې، د هېواد د خپلواکۍ نهه نوي يمه کليزه په داسې حال کې رارسېدلې چې هېواد يوځل بيا د “امريکا استعمار” لاندې دی زياتوي چې څو تنو “افغانما غرب پلوو د اشغال د پايښت په خاطر امنيتي تړون لاسليک کړی” او د هيواد ازادي يې يوځل بيا ګرو کړې ده.

دغه راز طالبانو ويلي چې د خپلواکۍ له انګريزانو څخه د ۹۹ کليزې د ازادۍ پر اخيستلو وياړي او په وينا يې لرې نه ده چې “د يوويشتمې پيړۍ د نړۍ خور استعمار د شکست وياړ هم افغانان خپل کړي”.

همدارنګه طالبانو امريکايانو ته ورياده کړې چې برتانويانو په ډيرو هڅو ونه شو کړای چې افغانستان خپله “مستعمره” وګرځوي ” دوی يې هم د متعال رب په نصرت او د دې اولس په قربانۍ نشی مستعمره کولای”.

طالبان وايي، امريکايي اشغالګر دې د برتانيې له ماتې عبرت واخلي او د هغوی برخليک ته په کتو دې له زور او سرتمبګۍ څخه لاس په سر شي.

د يادونې ده، چې طالبان هر کال د هېواد په ټولو ولايتونو کې د خپلواکۍ ورځ د امريکايي او افغان ځواکونو څخه د نيول شويو وسایطو په ښودلو لمانځي او په ځانګړو راپورونو کې يې نشر ته سپاري.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close