طالبان.. د غزني ښار په دروازو کې

د امریکا نیویارک ټایمز ورځپاڼې په خپل یوه وروستي راپور کې ویلي چې طالبان د غزني ښار تر دروازو رارسېدلي دي او د ولایت په مرکز کې پراخ حضور او نفوذ لري.

د راپور له مخې، په غزني ښار کې د طالبانو د پراخ شتون او نفوذ له امله، د ښار اوسېدونکو ته د ښار مسؤل او کنټرولونکی مشخص کول ستونزمن دي.

د غزني ښار، چې شاوخوا ۲ لکه اتیا زره وګړي پکې اوسېږي او د پلازمېنې کابل جنوب خوا ته په ۱۱۰ میله کې پروت دی، له زیاتې مودې راهیسې د طالبانو تر ګواښ لاندې دی او ورځ په ورځ یې امنیتي وضعیت د خرابۍ پر لور روان دی.

د نیویارک ټایمز ورځپاڼې خبریال، جواد سخنیار، په خپل راپور کې لیکلي، طالبان په ښار کې په ازاد ډول اوسي، له دوکاندارانو خپله مالیه اخلي، او وخت ناوخت په چریکي بریدونو کې دولتي چارواکي په نښه کوي.

د غزني ښار چارواکي وايي چې چریکي بریدونه زیاتره د موټر سایکل سپرو ځوانانو له لوري د بې غږه تفنګچو په مټ ترسره کېږي.

یوه امنیتي چارواکي یادې ورځپاڼې ته د خبرو پر مهال د طالبانو پر وړاندې له اقدامه عاجزي ښودلې او وايي حتی د ویرې له امله یې نیولای هم نشي.

”طالبان په ښار کې حضور لري،“ چارواکي د ښار نږدې پرتې سیمې ته په اشاره کولو سره وویل. ”طالبان دلته خپل کورونه لري او څه چې وغواړي کولای یې شي.“

نوموړي زیاته کړې، ”د دوی زیاتره کسان په خپلو کورونو کې وسلې لري، او موږ هیڅ هم نشو کولای، ځکه د څه کولو توان نه لرو. که موږ دوی ونیسو او بندیان یې کړو، ډېر ژر به له زندانه ووځي او د خپل غچ اخیستلو لپاره به بېرته په پولیسو پسې راشي.“

Sayed Mustafa/EPA, via Shutterstock

د غزني والي عبدالکریم متین، چې د ولایت په ودانۍ کې دننه له یوه ځایه بل ځای ته په مرمۍ ضد موټر کې ځي، هم منلې چې طالبان په ښار کې پراخ حضور لري او د حکومت پر ځای دوی له خلکو مالیه اخلي. متین وايي، ”له بده مرغه، طالبان له خلکو، که هغه دوکاندار وي که بل څوک، د مالیې په نوم پیسې راټولوي.“

د ده په خبره، ”دا مالیه نه ده، بلکې له خلکو په زور د پیسو اخیستنه ده.“

بل خوا، د غزني د ولایتي شورا غړي وایي که چیرې حکومت د ولایت ادارې ته پام ونکړي، نو ولایت به سقوط وکړي او د طالبانو لاس ته به ولوېږي.

غزنی یو له هغو ولایتونو دی چې د طالبانو نفوذ او شتون پکې زیات دی، او په ګڼو ولسوالیو کې حکومت یواځې د ولسوالیو پر مرکزونو واک لري.

د غزني د والي ویاند، محمد عارف نوري، افغان نیوز رسنۍ ته ویلي چې د اندړو، ده یک، ګېرو، خوګیاڼي، قره باغ، ګیلان او خواجه عمري په ګډون د غزني ۱۴ ولسوالۍ د طالبانو تر ګواښ او نفوذ لاندې دي.

له تېرو پنځو ورځو راهیسې، طالبانو د غزني-پکتیکا لویه لار تړلې او امنیتي ځواکونه له هڅو سره سره، د لارې په خلاصولو نه دي بریالي شوي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close