طالبان: د قطر دفتر په تړاو خپاره شوي راپورونه، ”ددښمن د استخباراتي ارګان پروپاګند دی“

(کابل ټکی کام ۱۳۹۷ زمری ۱۳)

طالبانو د ځینو رسنیو له خوا هغه خپاره شویو راپورونو ته توند غبرګون ښودلی چې ګواکې د قطر د دفتر استازو او د طالب مشرانو تر منځ اختلاف رامنځته شوی دی.

طالبانو ویلي، ”موږ دغه بې اساسه راپور او تورونه په کلکه ردوو. د اسلامي امارت مسئولین الحمدلله سپېڅلي او متعهد خلک دي، نه له مشرتابه سره کوم اختلاف لري، نه يې هم په خپلو کارونو کې د خپلو مشرانو له اجازې پرته کوم ګام اخیستی دی.“

څو ساعته وړاندې د پژواک او تاند په ګډون ځینو رسنیو د خپلو نامعلومو سرچینو په حواله خبر خپور کړ چې په قطر کې د طالبانو د دفتر مشر، شیر محمد عباس ستانکزي، له افغان چارواکو سره په سعودي او اماراتو کې کتلي، چې تر کتنې وروسته د دفتر د استازو او د طالبانو د مشرتابه ترمنځ جنجالونه راپارېدلي او د قطر دفتر ته د نوي مشرتابه د معرفي کولو پلانونه هم په پام کې نیول شوي دي.

 خو طالبانو په خپره شوې اعلامیه کې د قطر د استازو ننګه کړې او په وینا یې چې ”د شېر محمد عباس ستانکزي صاحب په ګډون د دفتر ټولو غړو په سیاسي برخه کې د اسلامي امارت له اصولو او داعيي څخه کلکه دفاع کړې، له نړیوالو جهتونو سره يې بریالي تماسونه ټینګ کړي او په بین المللي سطحه يې د اسلامي امارت لپاره په سیاسي برخه کې نه هېرېدونکي خدمتونه ترسره کړي دي، چې له امله يې د اسلامي امارت د رهبرۍ د اعتماد وړ ګرځېدلي او تراوسه پورې په اطاعت او اخلاص سره د اسلامي امارت سیاسي برنامي پرمخ وړي.“

طالب ویاند، ذبیح الله مجاهد، د رسنیو د دې راپورونو د خپرېدو لامل دا ښیي چې دفتر یې په دې وروستیو کې په سیاسي ساحه کې لويې لاسته راړونې ترلاسه کړې دي.

د ده په خبره، ”د ذلیل دښمن استخباراتي کړیو هم د شخصیت وژنې هڅو ته زور ورکړی دی. کله د اسلامي امارت د سیاسي دفتر په مشرتابه او غړو پسې بې اساسه تورونه پورې کوي، کله د مشرانو ترمنځ د اختلافاتو غلط راپورونه خپروي او کله نورو پوچو تبیلغاتوته لاس اچوي.“

طالبانو یو ځل بیا ویلي چې ټول کارونه به یې د شریعت په چوکاټ کې د اطاعت او فرمانبردارۍ په اساس ترسره کیږي او له خپلو افرادو او متعهدو ولسونو یې غوښتي چې په خپلو مشرانو باندې حسن ظن او کلک باور ولري. ”په دښمن پورې د اړوندو مراجعو پروپاګند ته هيڅ ارزښت ورنه کړي.“

د یادونې وړ ده چې دا لومړی ځل نه دی چې رسنۍ طالبانو پسې دا ډول خبرونه نشروي، تر دې وړاندې هم په ځلونو ورته هڅې شوې چې د طالبانو له خوا وخت پر وخت رد شوې او کوم حقیقت یې هم نه دی موندلی.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close