طالبان چېرته جگړه وکړي؟ خالد روان

پښتانه متل کوي: زور مې پر تا نه رسېږي، مړ به دې پلار کړم. همدغه متل زموږ پر حکومت او امریکا هم ښه پلی کېدای شي. د امریکا له یرغل وروسته او تر ننه د طالبانو د مبارزې تر شا د پاکستان لاس ښودل کېږي. په لوی لاس د امریکا پر وړاندې روان جهاد د پاکستان په نامه کېږي، دلته ټول جنگېدونکي افغانان دي؛ خو دا جگړه بیا هم د پنجابیانو جگړه ده. بمبار پر افغانانو کېږي، کورونه د افغانانو ورانېږي، میلیونونه افغانان له خپلو سیمو کډه شوي؛ خو بیا هم جگړه د پنجاب ده. د هغه پنجاب چې د نړۍ لومړۍ درجه استخبارات لري، د نړۍ اووم نمبر پوځ لري؛ خو ټول عمر یې د خیراتونو په راټولولو تېر کړی او په ۷۰ کلونو کې یې یوازې د کشمیر مسلمانان له هندوستانه راخلاص نه کړای شول.

د پنجاب ډرامه لا په رسنیو کې لا پای ته رسېدلې نه وه، چې د روسیې ډرامه پیل شوه. طالبان او روسان اړیکې لري، روسانو له طالبانو سره د پرمختللیو وسلو مرسته کړې، روسان باید د طالبانو پر ځای له افغان حکومت سره مرستې وکړي او دغه ډول گیلې، گواښونه او شکایتونه تر نننه اورېدل کېږي.

امریکا، ناټو او افغان حکومت درې واړه په یوه خوله وايي، چې روسان باید له دوی سره مرستې وکړي؛ نه له طالبانو سره؛ خو امریکا له دومره استخباراتو او معلوماتو سربېره بیا هم د طالبانو سره داسې وسلې او مهمات ونه نیول، چې روسیه کې جوړ شوي وي، بلکې طالبان اوس هغه وسلې کاروي، چې په اروپا او امریکا کې جوړې شوي او طالبانو د ټوپک په زور له پولیسو، اردو او کمانډویانو نیولي او اوس یې د دوی پر ضد کاروي. که له طالبانو سره امریکايي وسلې ولیدل شي؛ نو نړۍ به امریکا ته ووايي، چې تاسې ولې له طالبانو سره مرسته کوئ؛ ځکه ستاسې جوړې شوي وسلې طالبان کاروي. نو د امریکا ځواب به څه وي؟

له پاکستان او روسیې سربېره له طالبانو سره بل مرسته کوونکی هېواد ایران دی. هغه ایران چې د سنیانو بېخ یې وویست، هغه ایران چې اوس عملاً په سوریه کې په جگړه بوخت دی، هغه ایران چې اوس په عراق کې هم جگړه کوي، په یمن کې له شیعه گانو ملاتړ کوي، له سعودي سره یې جگړه روانه ده، امریکا، اروپا او نیمې نړۍ پرې بندیزونه لگولي او په افغانستان کې له طالبانو هم ملاتړ کوي.

دا څنگه ایران دی. ایران خو نه امریکا ده، نه چین دی او نه کاناډا ده؛ بلکې زموږ گاونډی هېواد دی، چې له لسیزو راهیسې د نړیوالو له اقتصادي بندیزونو سره مخ دی، اقتصاد یې خراب شوی او لا نور هم خرابېږي. خو ایران له دومره نړیوالو او سیمه‌ییزو سیالو سره سربېره بیا هم له طالبانو سره مرسته کوي؟

درې ورځې وړاندې طالبانو د فراه پر ښار ډله‌ییز بریدونه پیل کړل، چې هم‌مهاله یې د سقوط اوازې هم خپرې شوي. طالبانو د فراه مهم ځایونه ونیول او زرگونه میله سپکه او درنې وسلې یې هم له ځانونو سره یوړې. دا چې فراه ولې په بشپړ ډول سقوط نه شوه، لا هم معلومه ده؛ کېدای طالبانو د ملکي تلفاتو د مخنیوي په خاطر بېرته شاتگ کړی وي.

په ټولنیزو شبکو او په ځانگړي ډول د دولت کرایه شویو لیکوالو د فراه جگړه د هلمند د اوبو او د ټاپي د غازو د نل لیکې جگړه بلله او د طالبانو د مشر په نامه یې یو جعلي لیک هم خپور کړی و.

د افغانستان او ایران د اوبو معاهده ۴۵ کاله وړاندې لاسلیک شوي او د همدغه تړون له مخې د هلمند اوبه ایران ته روانې دي. نو د فراه جگړه بیا هم د هلمند اوبو جگړه وه؟
د ټاپي لومړی بنسټ طالبانو ایښی و. تېر کال طالبانو یې ملاتړ وکړ، نو اوس د طالبانو مشر ولې د دغه نل لیکې د تېرېدو مخالفت وکړي؟

د کندوز د سقوط پر مهال ځینو اوازه خپره کړې وه، چې کندوز روسانو سقوط کړ. که به دې پوښتنه ورنه وکړه، چې د روسانو د کندوز په سقوط کې څه وو، نو غلي پاتې کېدل.

د طالبانو جگړه یوازې په لویدیځ او ختیځ کې روانه ده، بلکې د طالبانو جگړه په ټول افغانستان کې روانه ده او ټول افغانستان له نورو هېوادونو سره گډې پولې لري. یعنې طالبان باید یوازې په مرکزو ولایتونو کې جگړه پر مخ یوسي او سرحدي ولایتونو کې باید جګړه ودروي؛ ځکه بیا پرې یوه ټاپه لگېږي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close