عسکره وروره! اوس خو پوه شه

بدرالدین ابدال

دوه ورځې وړاندې د ننگرهار د بهسودو پله سره نږدې! د ملي اردو پر سرتېرو برید وشو. له برید نه وروسته سمدلاسه فېسبوکیانو اوازه خپره کړه، چې د داعش ځانمرگي بریدگر ته د ملي اردو سرتېري غاړه ورکړې وه او نور خلک یې وژغورل؛ خو خپل ځان یې قرباني کړ.

ځینو فېسبوکیانو ورته د چندې خبره هم وکړه، خو تر نننه یې د چندې کوم خبر نه دی لیکلی، چې څومره خلکو ورسره مرسته وکړه. که د محمد عمر کورنۍ سره میلیونونه ډالر مرسته وشي، بیا هم کومه گټه ورته نه لري. انسان چې نه وي، نو په پیسو به یې کورنۍ څه وکړي؟

له تېرې اوونۍ راهیسې د جلال اباد امنیت اردو ته سپارل شوی. په جلال اباد کې د سختو پلټنو سربېره بیا هم دوه بریدونه وشول. یو د ملي اردو پر سرتېرو او بله چاودنه په یوه پلازه کې وشوه. دولتي لیکوالو«خیاطانو» په دې خاطر داسې اوازې خپروي، چې د خلکو پام بل لوري ته شي او داسې پوښتنې ونه کړي، چې د جلال اباد امنیت اردو سره دی، بیا هم بریدونه کېږي او بریدگر سیمې ته ځان رسوي.؟

عموماً بریدگر ځان ژوندی امنیتي ادارو ته نه سپاري؛ خو کله چې ونیول شي، بیا یې له وسې هېڅ هم نه کېږي. د جلال اباد په پېښه کې هم ځینې پوښتنې شته، چې باید ځواب شي.

۱)بریدگر نیول کېږي او دواړه لاسونه یې شاته اړول کېږي. داسې مهال څنگه کېدای شي چې هغه ځانته چاودنه ورکړي؟

۲)که دغه پېښه همداسې شوي هم وي، بیا هم څنگه د داعش بریدگر د ملي اردو تر ټانگونو ځان څنگه رسوي؟

۳)جلال اباد ته ټول تلونکي موټر او ځینې شکمن کسان پلټل کېږي. بریدگر بیا هم ځان ښار او بیا بهسود پله ته رسوي او چاودنه کوي؟

۴)د ځینو خلکو دغه خبره به بې‌ځایه نه وي، چې د داعش بریدگر د ښار په منځ کې د ملي امنیت له ادارې او یا هم د ننگرهار له هوايي ډگر ښار ته ننویستل کېږي او تر مهمو ځایونو رسول کېږي.

دغه هغه پوښتنې دي، چې د ننگرهار والي او امنیه قومندان یې باید ځوابونه ووايي او د خلکو د اذهانو د گډوډولو پر ځای خلکو ته سپینې خبرې وکړي.

جلال اباد د امریکا، د ملي امنیت شورا او د ملي امنیت د ادارې ستر قرباني ولایت دی او له تېرو څلورو کلونو راهیسې دلته د داعش وسله وال بریدونه کوي؛ خو په دې وروستیو کې یې یوازې ملکي ادارې خپل هدف گرځولي او یوازې همدغه ادارې په نښه کوي.

نېکولسن په خپله وايي: چې داعش غواړي جلال اباد خپله پلازمېنه کړي. نو په داسې وختونو کې د ملي اردو له واکه وتلې خبره ده، چې دلته امنیت ټینگ کړي. ځکه امریکایان او داعشیان د اردو او پولیسو په پرتله ښه روزل شوي او په استخباراتي پروژو کې د دوی نه ډېر ماهر دي.

محمد عمر څنگه خاورو ته وسپارل شو؟

خبره که هر ډول وه، خو محمد عمر نومي عسکر قرباني ورکړه. داسې فکر کېده، چې دی به په شاندارو مراسمو کې خاورو ته وسپارل شي؛ خو د دې اپوټه یې مراسم یې بېخي ساده او حتا رسنۍ نه وې ورغوښتل شوې، بلکې یوازې څو خپلوان او غمشریکانو په کې گډون وکړ.

زه د اردو او پولیسو لسگونه عسکر پېژنم، چې اوس یې د بدن ځینې برخې له لاسه ورکړي او پر کور ناست دي. د اردو قومندان یې یوازې تر هغه وخته پالنه کوي، چې دوی ژوندي وي او د دوی په گټه جگړه وکړي، خو کله چې معلول کېږي بیا یې څوک پوښتنه هم نه کوي.

د کابل په ۴۰۰بستریز روغتون کې د ملي اردو جسدونه له تېرو څو کلونو راهیسې پراته دي، خو د دفاع وزارت دومره نه شي کولی، چې جسدونه یې کورنیو ته وسپاري. هلته د ټپیانو پوښتنه بېخي د کولو نه ده، ځکه چې قومندان هغه عسکر غواړي چې روغ وي او ددوی په گټه له«پنجابیانو» سره جگړه وکړي؛ خو د داعشیانو د ژغورلو له‌پاره الوتکې سمدلاسه سیمې ورځي او روغ رمټ یې د طالبانو له منگولو ژغوري.

محمد عمر ټولو عسکرو ته یو ښکاره پیغام پرېښود، چې دلته ستاسې ژوند او ستاسې قرباني هېڅ گټه نه لري، بلکې ښه خبره داده چې نور دندې پرېږدي او د داسې مفسد نظام له‌پاره جگړه ونه کړي، چې د دوی پر سرونو لوبې کوي او د قربانۍ پسونه یې ترې جوړ کړي دي.

دوی ته یوازې جگړه کوونکي خلک په کار دي، چې تر هغه وخته جگړه وکړي چې دوی نور هم شتمن شي او خپلې گټې خوندې وساتي او که تاسې هر څومره قرباني ورکړئ، بیا هم گټه د جگړې د قومندانانو ده او خپلې کورنۍ د ویر پر ټغره مه کېنوئ.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close