عسکر لیونیان شوي دي

ننګرهار کې د اشرف غني عسکر لیونیان شوي دي، چې له کبله ئې دننګرهاریانو وینې بهیږي، دتابوتونو کاروبار په درز کې روان دی او کابو هر سهار دننګرهاریانو پر اوږو دپلرونو، وروڼو، وریرونو او مېندو جنازې بار وي.

نعمان لطیف

ننګرهار کې د اشرف غني عسکر لیونیان شوي دي، چې له کبله ئې دننګرهاریانو وینې بهیږي، دتابوتونو کاروبار په درز کې روان دی او کابو هر سهار دننګرهاریانو پر اوږو دپلرونو، وروڼو، وریرونو او مېندو جنازې بار وي.

یو وخت ننګرهار د امن او علم کور ؤ، دهېواد له هر ولایت خلک راتلل او ننګرهار کې مېشت کېدل اما اوس ننګرهار دګلو هار نه دی پاته. له غرب راغلیو روبوټانو ئې په ښکلا، امنیت او علمیت اور بلی کړی دی او دګلونو هار ئې راته په باروتو لولپه کړ

دننګرهار امنیت په لومړي ځل دمنظم پلان له مخې په داعشیانو وګواښل شو، ښوونځي او پوهنتونونه ئې تقریباً وتړل شؤل او کارونه په کې په ټپه ودرېدل. داعشیانو چې تر شاه ئې د امریکایانو کلک ملاتړ لري، په ننګرهاریانو هیڅ رحم ونکړ، بېدرېغه ئې ووژل، حتی په بمونو ئې کښېنول او په خورا وحشت ئې دوژلو لړۍ ته ادامه ورکړه

اوس چې دطالبانو له لورې داعشیان د سپین غر په لمنه کې کلابند دي او ننګرهار کې تر یؤه حده دوژنو لړۍ بنده شوې ده، عسکر لیونیان شوي دي او هره شپه په مظلومو ننګرهاریانو دبمونو بارانونه کوي

له ډېرو افغانانو سره اوس داسې اندېښنې را ټوکېدلي دي چې ګویا افغان جګړه بلیک واټر ته سپارل شوې ده خو اصل کیسه داسې نده، کیسه داسې ده چې جګړه خصوصي شوې ده مګر بلیک واټر ته نه ده سپارل شوې

جګړه ډاکټر غني او بانډ ئې ټیکه کړې ده او امریکایانو ته ئې ډاډ ورکړی دی چې د افغان عسکرو له منځه به داسې لیونیان کرایه کړي چې نه دچا ناموس پېژني، نه ترحم او عاطفه او داسې حالت را منځ ته کړي چې هېوادوال په بلیک واټر شکرونه وکاږي.

که مو زړه ته نه لویږي دصفر یک او دو قطعې کوم عسکر ته قران کیږدئ چې د وحشیانه او بېدرېغه بېګناه قتل او قتال امر چا ورته کړی دی؟!

دحضرت علي رضي الله عنه وینا ده چې پر کفر بناء نظام دوام کولای شي مګر ظالم نظام بقاء نلري او نه دوام کولای؛ که نظام سکوت شي ډاکټر غني دلته څه لري؟

یؤه ئې رولا ده او یو دی دی؛ نور ئې دلته څه شته دی؟ حتی ددې ملت سره ئې کوم ربط هم نشته دی

د ښځې او اولادونو ئې نه پښتو زده ده، نه ده دې ملت له عنعناتو او فرهنګ خبر دي، نه ده دې خاورې تابعیتونه لري، پلار ئې هم دغسې درواخلئ

نو لیونی عسکره! په تا څه شوي دي چې نه پر ځان رحم کوې، نه پر افغان مسلمان، او نه پر ګران افغانستان؟!

یؤه شېبه دا سوچ ته دروله چې نظام سکوت شوی دی، امریکایان تښتېدلي دي او غني ئې هم له ځان سره بوولای دی؛ ته چېرې تښتې او د هېواد په کوم ګوټ کې دپټېدو ځای لرې؟

په دې هم سوچ وکړه چې دا کومه بې فرهنګه جګړه چې ته کوې، آیا ته خور، مور، پلار، بچی او ورور نلرې چې په هغوی ترس وخورې؟

آیا ستا بچي دډاکټر غني دبچیانو غوندې اروپا او امریکا کې ژوند کوي؟

که طالبان ستا د وحشیانه اعمالو په بدل کې ستا کور ونړوي او تمامه کورنۍ دې ووژني، غني به تاته څه درکړي؟

هغه چې پخپله روبوټ دی او په ریموټ ناڅي تاته به څه درکړی؟

هغه تر دې کچې، کچه او غلام دی چې دخپل ځان پوښتنه نشي کولای، په تا به ننګ څنګه وکړي؟!

لیونی شویه عسکره! ته ددې ملت بچی ئې او سبا به دهمدې ملت رحم کرم ته پاته وې؛ که په ملت رحم نکوې په ځان او خپلې کورنۍ رحم وکړه

ستا مشران په جګړه کې ګټې لري او تر هغو به په جګړه اصرار کوي ترڅو چې ستا غوندې احمقان ددوی تر جغ لاندې وي

اور ژبي شاعر مطیع الله تراب دوی ډېر مخکې ولس ته داسې ورپېژندلي دي

دا د روبلو مینان اوس په ډالرو روږدي

دا په ښوروا په پلاونو او په لرو روږدي

دوی په نڅا په موسیقۍاو په سندرو روږدي

چې ددوی جیب ډک وي ملي ګټه تاوان څه کوي؟

دوی پرمذهب او پښتون پښتونستان څه کوي؟

دا په هندي ډرامو بوخت دي، دين ایمان څه کوي؟!

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close