غزني: د اشرف غني غونډې ته څېرمه توغندي لګېدلي- ښار کې جګړه روانه ده

(کابل ټکی کام، ۱۳۹۷، تله ۵)

د ملي يووالي حکومت مشر اشرف غني نن سهار د غزني د امنيتي وضعيت د څارنې په موخه دغه ولايت ته سفر وکړ او د غزني له چارواکو سره پر امنيتي وضعيت خبرې کولې چې د ولايت مقام ته څېرمه توغندي ولګېدل.

د غزني د ولايتي شورا غړی نصير احمد فقيري وايي، چې دوه توغندي د ولايت مقام سره نږدې د هده کابل او شاه مير سيمو کې لګېدلي دي.

ځايي امنيتي سرچينې وايي، تر اوسه درې توغندي د ولايت ودانۍ ته څېرمه لګېدلي او د نورو توغنديو د لګېدو امکان هم شته.

تر دې دمه په توغنديو کې د اوښتې مرګ ژوبلې په اړه معلومات نه دي ترلاسه شوي خو د ولايت مقام يوې سرچينې رسنيو ته ويلي توغندي په داسې حال کې لګېدلي کله چې اشرف غني چارواکو ته وينا کوله.

له بلوه پلوه راپورونه وايي، چې د غزني ښار په مربوط په قلعه قاضي سيمه کې د طالبانو او دولتي ځواکونو تر منځ سخته جګړه روانه ده.

شاوخوا دوه مياشتې مخکې طالبانو د غزني پر ښار برید وکړ چې پنځه نوي سلنه خاوره يې ونيوله خو د افغان او بهرنيو ځواکونو له لوري ملکي خلکو ته په هوايي بريدونو کې د تلفاتو اوښتو له کبله يې بيرته پرېښود.

دا مهال د غزني څو ولسوالۍ په بشپړه توګه د طالبانو په حاکميت کې دي او پاتې نورې يې هم تر سختې کلابندۍ لاندې دي.

تيره ورځ د دغه ولايت د اندړو ولسوالۍ چارواکو رسنيو ته وويل چې طالبان د ولسوالۍ ودانۍ ته دومره نږدې راغلي چې غږونه راکوي چې تسليم شئ که نه وبه وژل شۍ.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close