غزني ولايتي شورا: طالبان دولتي کسان له کورونو باسي، ځان سره يې وړي

(کابل ټکی کام، ۱۳۹۷، زمری ۲۳)

د غزني د ولايتي شورا غړی نصير احمد فقيري وايي، طالبانو د ښار په بېلابېلو سيمو د دولتي کسانو د کورنو پلټنې عمليات پيل کړي دي زياتوي “طالبان دولتي کسان له کورونو باسي او له ځانه سره يې وړي”.

دا په داسې حال کې ده، چې نن د دفاع وزارت وياند غفور احمد جاويد رسنيو ته ويلي چې امنيتي ځواکونو د ښار په نوي سلنه برخه ولکه ټينګه کړې زياتوي دغه ښار ته تازه دمي ځواکونه رسېدلي او د ښار په تصفيه کولو بوخت دي.

نوموړی وايي، د ښار په ځينو سيمو کې لا هم مزاحمت شته خو د له منځه وړلو لپاره يې عمليات پيل شوي دي.

له بله پلوه طالب وياند ذبيح الله مجاهد په تازه ټويټ کې ليکي: “تیره شپه بیا هم دغزني ښار ټولې پخوا نیول شوي سیمې له مجاهدینو سره وي، دښمن په هيڅ برخه کې سر نه دی پورته کړی، نه کوم پرمختګ لري”.

نوموړي د دولتي چارواکو هغه ادعاوې رد کړې ګنې د ښار ډيره برخه يې له طالبانو نيولې په وينا يې: “په رسنیو کې چې څه غلط معلومات د ازادۍ رادیو او نورو اشغال پلوه رسنیو څخه آورئ هغه ټول پروپاګند دی، اعتنا مه ورته کوۍ”.

نن پنځمه ورځ ده چې په غزني ښار کې د طالبانو جګړه روانه ده او په وينا يې تر دې دمه په دغه عملياتو کې “د دښمن د تلفاتو ابتدايي شمیر ۲۶۶ تنو وژل شوو او له ۱۷۸ پورې ټپيانوته رسیدلی دی” زياتوي د عملياتو له پيله تر دې دمه يواځې شپاړلس تنه طالبان وژل شوي او يوويشت تنه نور ټپيان دي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close