غزني کې تر ”سلو زیات“ دولتي عسکر طالبانو ته تسلیم شول

طالبان وايي چې پر غزني ښار د برید په دویمه ورځ، تر سلو زیاتو دولتي عسکرو له جګړې لاس اخیستی او له دوی سره یو ځای شوي دي.

د طالبانو ویاند، ذبیح الله محاهد، پر خپله ټوېټر پاڼه لیکلي چې نن (د زمري ۲۰مه / ۱۱ اګست) ۱۱۷ دولتي سرتېري له دوی سره یوځای شول او ”له حتمي مرګ څخه يې نجات وموند.“

د مجاهد په خبره، دا ۱۱۷ دولتي عسکر له بېلابېلو امنیتي ارګانونو سره تړاو لري او د خپلو مرکزونو او پوستو تر پرېښودلو وروسته دوی ته تسلیم شول.

تسلیم شوي سرتېري د طالبانو له تاوده هرکلي سره مخ شوي دي.

دولتي چارواکي پر غزني ښار د برید له پیل راهیسې له رسنیو سره د ښار د وضعیت په اړه معلومات نه شریکوي او یواځې پر خوشباورۍ بنا څرګندونې کوي. دوی د دې پيښې په هکله هم تر دې دمه څه نه دي ویلي.

دا ”۱۱۷“ دولتي عسکر د هغې اعلامیې تر خپرېدو ووروسته طالبانو ته تسلیمېږي چې تېره ورځ پر ښار تر برید څو ساعته وروسته رسنیزه شوه. پر دولتي ودانیو د بریدونو پر مهال هم طالبانو له دولتي عسکرو د تسلیمۍ غوښتنه کوله.

په یاده اعلامیه کې، چې د طالبانو د د دعوت، ارشاد، جلب او جذب کمېسیون له لوري خپره شوې وه، له دولتي عسکرو د وسلو ايښودلو غوښتنه شوې وه او تر تسلیمۍ وروسته د سر، او مال تضمین ورکړل شوی و. د اعلامیې په پای کې د تماس لپاره دوې ټلفوني شمېرې، د مخابرې نمبر او ایمېل هم ذکر شوی و.

که رښتیا هم د ”۱۱۷“ عسکرو په ستر شمېر کې دولتي عسکر له طالبانو سره ”یوځای شوي وي“، دا به په حکومت او ځايي امنیتي ځواکونو کې لویه تشه رامنځته کړي او د هغوی پر مورال به منفي اغېز وکړي.

د غزني محبس مات شو:

نن، پر غزني ښار د برید په دویمه ورځ، طالبان د غزني د محبس پر ماتولو بریالي شول او لسګونه بندیان یې ازاد کړل.

طالبان وايي چې بندیان تر خوشي کېدو سمدستي وروسته د خوندي سیمو په لور ولېږدول شول.

دولتي چارواکو تر دې دمه څه نه دي ویلي.

• د ګیلان ولسوال ووژل شو:

بل خوا، نن د غزني د ګیلان ولسوالۍ ولسوال او څارنوال له غزني ښاره د تیښتې هڅه کوله، خو له طالبانو سره تر مخ کېدو وروسته دواړه ووژل شول او موټر او وسلې یې طالبانو ونیولې.

• پر غزني ښار د طالبانو برید:

د یادونې وړ ده، طالبانو د (۱۹ زمری / ۱۰ اګست) د شپې په ۱۲ بجو، پر غزني ښار له څلورو لورو ستر عملیات پیل کړي، چې په پایله کې یې د غزني ښار نږدې ۸۰ سلنه برخه د طالبانو په ولکه کې راغلې او دولتي سرتېرو ته پراخه مرګ ژوبله اوښتې ده. په دې عملیاتو کې د دولتي ځواکونو یوه چورلکه هم رانسکوره شوې، چې چارواکي یې د رانسکورېدو لامل ”تخنیکي ستونزې“ بولي.

له دې سره هممهاله، طالبانو په میدان وردګ کې د کابل-کندهار لویه لار د دولتي کومکي ځواکونو پر مخ تړلې او ملکي وګړو ته یې امر کړی چې د جګړې له امله پر دې لویه لار سفر ونکړي.

په دې ستر برید کې، چې اوس هم دوام لري، د امریکايي-افغان هوايي ځواکونو الوتکې د دولتي ځواکونو په ملاتړ په فضا کې ګرځي، خو د طالبانو پر په نښه کولو نه دي بریالۍ شوې.

ښار ته کومکي ځواکونه رسېدلي او له طالبانو سره په جګړه بوخت دي. دولتي چارواکي د خپل عادت له مخې د ښار وضعیت ”ارام“ او د دولتي ځواکونو ”په کنټرول کې“ بولي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close