غزنی کې د کورنیو طالبانو او د حکومت د بهرنيو ”سلاکارانو“  مرګونې جګړه

سرليکنه

په غزني کې جګړه څلورمې ورځې ته وغځېده، پنځمې ته هم غځېدونکې ده. د جګړې په پیل کې ځايي پوليسو او نورو امنيتي ځواکونو لومړی د ښار په ځینو برخو کې يو څه مقاومت وکړ خو وروسته یې د تيښتې لار ونيوله.

 په لومړيو کې چې طالبانو د غزني پر ښار  بريد وکړ، د غزني امنيتي چارواکو ويل چې د طالبانو بريد یې پر شا تمبولی دی. خو کله چې رسنيو د طالبانو لخوا د يو شمېر ښاري ساحو د نيولو خبر ورکړ، دفاع وزارت د غزني د لاسه ورکړو ساحو د بيا نيولو لپاره د ځانګړو کوماندو د لېږد او له طالبانو د نيولو شویو سيمو د بيا ترلاسه کولو سينه وډبوله.

په لومړيو کې راپورونه ورکړل شوي وو چې طالبان د امنيتي پوليسو له وژلو پرته د غزني د نيولو اراده لري، خو چې په غزني کې د تر ١٠٠ زياتو امنيتي پوليسو د وژلو راپورونه خپاره شول او د روغتون د مسئول دا وينا چې نور په روغتون کې د امنيتي پوليسو د درملنې ځای نه لري، دفاع وزارت د امريکايي پوځونو له قوماندان څخه غزني ته د بهرنيو پوځونو د لېږد غوښتنه وکړه.

غزني ته د بهرنيو پوځونو د لېږد او هلته له طالبانو سره په جګړه کې د امريکايي ”سلاکارانو“  او يا د ناټو د پوځونو اخته کېدلو وښودله چې په غزني کې د افغانانو او بهرنيانو تر منځ جګړه روانه ده – طالبان پلي او بهرنيان د هوا له ليارې جګړه پرمخ بيايي. په ښار کې چې له کومو ودانيو لوګي پورته کېږي، دا د بهرنيو هوايي پوځونو د بمبار لوګي دي.

دفاع وزارت وايي چې طالبان د غزني له ښاره پر شا شوي دي، خو د ناټو وياند وايي چې اوس هم د ښار په ځینو برخو کې جګړه روانه ده او طالبان له ښاره وتلي نه دي، د افغان تازه دمو پوځونو او بهرنيو ”سلاکارانو“  په مقابل کې پوره مقاومت کوي.

څلورمياشتې دمخه چې ناټو افغانستان ته د نورو پوځونو د لېږد پرېکړه په بروکسل کې وکړه، ویې ويل چې افغانستان ته د جګړې لپاره نه بلکې د افغان پوځ د روزنې لپاره پوځونه لېږي. خو اوس وليدل شول چې د ناټو په چوکاټ کې د امريکايي پوځونو په شمول بهرني پوځيان په غزني کې په جګړه اخته دي او د طالبانو په مقابل کې جګړه کوي.

په غزني کې د ناټو د هوايي ځواکونو بمبار وښووله چې د طالبانو په مقابل کې افغان ځواکونو د مقامت توان له لاسه ورکړی. د تېر په څېر یې بهرنیو ”سلاکارانو“ د طالبانو د مرکزونو په پلمه پر ولسي او دولتي مرکزونو بمبار وکړ، چې له امله یې روغتون ته تر دېرشو د زياتو ولسي وګړو جسدونه رسول شوي دي.

دفاع وزارت غواړي چې په خپلو اعلاميو سره د خپل مورال-بايللي پوځ مقاومت په رسنيو کې وښيي. وايي، له غزني ښاره مو طالب وسله وال ایستلي، حال دا چې کرۍ شپه په غزني کې جګړه روانه وه او له هوايي بمبار سره سره طالبانو نيولې شوې سيمې له لاسه نه دي ورکړې.

که د ناټو په بمبار سره له غزني ښاره طالبان د ښار د ودانيو د خوندي پاتې کېدا او د ولسي وګړو د ژوند د ژغورنې لپاره ځینې ساحې پرېږدي، بيا هم هغه ادعا چې دفاع وزارت به د خپل پوځ په ډاډ کوله، ويل به یې چې افغان پوځ د خپل هېواد دفاع کولای شي، له منځه ولاړه.. او د پوځي روزنې په نامه ”سلاکاران“ یې جګړې ته راوغوښتل.

اشرف غني زيات وخت بې بنسټه ويناوې کوي، خو کله کله يوه نيمه خبره رښتيا هم وکړي. رښتيا یې دا ده چې شپږ مياشتې دمخه یې په يوه مرکه کې وويل چې د بهرنيانو له ملاتړه بغير يوه اونۍ هم خپل حکومت نه شي ساتلاى.. او هغه خبره یې د غزني په جګړه کې ثابته شوه.

د غزني روغتون د پوځیانو له جسدونو ډک دی. څه جسدونه د ښار په کوڅو او څه په روغتون کې پراته دي. د ناتو وياند خبر ورکړی ؤ چې طالبان به په يوه ورځ کې له غزني باسي، خو دا دی ليدل کېږي چې پر غزني د داخلي طالبانو او بهرنيو ”سلاکارانو“ ترمنځ روانه جګړه څلورمې ورځې ته هم وغځېده او لا روانه ده.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close