غلامانه سکوت

نعمان لطیف

له څه مودې راهسې امریکایانو په افغان ولس مسلسل بمبارونه پیل کړي دي، هره شپه او هره شېبه په ولس درانه او ړانده بمونو غورځوي، چې ترڅ کې یې لسگونه جنازې پورته کېږي.

دتازه وحشیانه بمباریو تسلسل چې له لوگر پیل شو، او ننگرهار، پکتیا، خوست، فراه، هلمند او کندوز کې یې زموږ لسگونه هېوادوال په خواږه خوب ویده په شهادت ورسول؛ تر دې دمه بلا ناغه او بلا پوښتنې دوام لري.

له بې مُهاره او بې تمیزه یرغلگرو پوځیانو بله توقع نشي کېدلای او نه یرغلگر موږ ته امن او سوکالي اعاده کوي؛ حیف په هغه ضمیرونو چې د ولس دنمائندگي او قیادت دعوې کوي او دساتنې او ژغورنې باټې یې غږوي خو په هره شېبه، او هره شپه وژنو یې خولې گنډلې دي.

شاعر رښتیا وایي:

 

ټوله دوکه او ټول چل دی خپله وسه پورې

ددې کلي هر یو سړی غل دی خپله وسه پورې

ودان او بسته کلي بمبار شي، روغ ـ جوړ کورونه کنډوالې شي، دکور ټول وگړي تر دېوالونو او کوټو لاندې، ټوله شپه ترپکې ووهي، سلگۍ ووهي او ساه ورکړي؛ ددفاع وزارت په ډېره بې شرمۍ دعوه وکړي چې طالب مشران یې وژلي دي.

کله چې هر څه عیان شي، برای نام ولس مشر د ولسي تېر باسنې په پار کمیسیون وټاکي. کمیسیون ومني چې ولسي خلک بمبار شوي دي خو لکۍ ورپسې غوټه کړي چې گویا طالب د ولسي خلکو منځ ته تللی ؤ.

کمیسیون ستون شي، بس په همدې ټوله کیسه ختمه شي.

طالب دخلکو تجمع ته تللی ؤ، لامل همدا ؤ چې اجتماع بمبار شوه؛ دا اوس تحقیق دی او بې پرې تحقیق دی؟ په دې دلیل خو موږ طالب ته په خپله، دخپل مرگ جواز ورکوو.

طالب دهمهغه کلي دی، همالته یې کور او ژوند دی، همالته یې گشت او کښت دی، دهمدې کلي په مدرسه، او ښوونځي کې اولادونه او وروڼه سبقونه وایي. طبعي ده چې دې ټولو ځایونو ته به راشه درشه کوي. اوس که دطالب دوژلو لپاره حکومت دټول ولس وژل روا بولي، دا نو په عامه ځایونو کې طالبانو ته د انفجاراتو مشروعیت حکومت په خپله ورکوي.

احیاناً که طالبان دملکیانو دبمبار عاملین هم شي، د ولس مشر سکوت مجرمانه نه دی؟

دکندوز په مدرسه بمبار، په خوست کې د کمپایني عسکرو له لورې د زیاتو مدارسو نړؤل، او استادان یې شهیدانول او همدا رنگه په ننگرهار، قندهار او فراه ولایتونو کې دکمکیو طلباؤ شهادتونه، زنداني کول او په مدارسو یې مسلسلو شپنیو چاپو دډاکټرصیب غني سکوت مات نه کړ؛ آیا دغني سکوت دملي ټرمینالوژۍ او دیني ارزښتونو خلاف مجرمانه او ظالمانه سکوت نه دی؟!

دډاکټر صیب سکوت تر مجرمانه غلامانه زیات دی، او ډاکټر صیب مجبور دی چې غلامانه سکوت وکړي او دغلامانه سکوت لپاره دده خیاطان مکلف دي رنگ په رنگ بهانې هم ولټوي.

پاکستان زموږ خاورې ته نیمایي راننوت، چې وپوښتو دا ولې؟ ځواب دا وي چې که طالبانو جگړه نه کولای پاکستان وړاندې نشوای راتللی.

دا اوس کومه کیسه ده چې هغه راباندې په وړاندې راروان دی او زموږ د امنیت سلاکار هره شنبه او پنجشنبه اسلام اباد ته ور روان دی او بیا د پړ گوته طالب ته نیولای کېږي؟

که ووایو؛ ولس ولې بمباریږي؟ خیاطان وایي ملامت طالبان دي، د یرغلگرو پاته کېدو ته سببونه او بهانې طالبان جوړوي، که طالبان وسله کېږدي یرغلگر خپله تښتي.

خو ډاکټر غني وایي موږ بهرنيو پوځیانو ته اړتیا لرو. طبعي ده چې د اړتیا پوره کولو په پار غلامانه سکوت ته اړتیا ده او په طالبانو تورونه پورې کول، د ولس د ذهني تخدیر او د امریکایي وحشت د پټولو ناکامه هڅه ده.

دا ولس دډاکټر غني او څو ضمیر پلورو مشرانو همدردۍ ته ضرورت نه لري، نه د دوی همدردي د ولس پرهرونو ته پهې، او ټکور کېدلای شي خو دوی باید وپوهېږي چې دپردیو یرغلگرو چوپړ او د خپل مؤمن او متدین ملت په خلاف په ناروا وحشت سکوت، ترسره شوي وحشت ته توجېهات او جوازونه لټوَل، او ورکوَل د ملت په محکمه کې په ځان عریضه کول دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close