غني او بهرامي رښتيا خو جنرال بنچ بالکل دروغ ويلي

تميم توفيق
د ملي وحدت حکومت رئيس (ډاکټر اشرف غني) ويلي چې تر اوسه پورې يې له طالبانو سره هيڅ ډول خبرې نه دي کړې، دغه راز د همدې دولت د دفاع وزير طارق شاه بهرامي د مشرانو جرګې د غړو پوښتنو ته په ځواب کې ويلي چې د امنيتي تړون لاسليک ځکه ښه کار و چې هيواد مو شلو استخباراتي ډلو سره مخامخ دی. او د امريکايي هوايي قواوو مرستيال قومندان جنرال لينس بنچ ويلي چې له کمکي اختر وړاندې يې په طالبانو ۱۵۴ بمونه غورځولي دي.
غني او بهرام دواړو په خپل ځای رښتيا ويلي، بلکې غني خو په هغه اندازه رښتيا ويلي چې په هيواد د امريکا له لومړي ميزايلي بريد راوروسته پرې چا خوله نه وه چوله کړې، مګر د جنرال بنچ خبرې په څو دلايلو چورلټ دروغ بللی شو.
موږ په تيره ۱۷ کلنه دوره کې د طالب وياند ذبيح الله مجاهد نورې څرګندونې او عبرګونونه دومره نه دي ليدلي، لکه څومره چې يې د کرزي او ملي وحدت حکومتي منسوبينو ادعاوې رد کړې، چې دوی ورسره مذاکرې او ناستې نه لري، ادعاوې يې پوچې او تبليغاتي جنبه لري او…….
د ذبيح الله مجاهد په دې خبرو مو زيات باور ځکه نه کاوه چې کله کله ځينې طالب ته منسوب کسان د رسنيو په پردو ليدل کيدل چې د کرزي/ملي وحدت حکومت له مامورينو سره په خبرو بوخت دي. که څه هم د هغوی د طالب نمايندګي ادعا دروغژنه وه، خو موږ يې د واقعي او حقيقي طالبانو، چې د دغه خوځښت واک يې په لاس کې دی او ۱۷ کاله يې له بهرني اشغال سره مبارزه کړې، د خبرو په رښتينولي شکمن کړي وو.
همدا رنګه يو اړخ ته د يادو دوو حکومتونو د چارواکو لخوا وخت ناوخت د طالبانو د تسليمي «مخ پټي» انځورونه نشرول و او بل اړخ ته د رسنيو تبليغاتي څپه هم دومره تيزه او قوي وه، چې ډيرو کمو بادرکه او باخبره هيوادوالو د چارواکو په ادعاوو د دروغو حکم کاوه، اکثرو دا هر څه واقعيټ ګڼلی و او د طالبانو په مبارزه، دريځ او دعوه يې شک کاوه.
۱۷ کاله وروسته د ملي وحدت حکومت مشر (ډاکټر اشرف غني) يوازې يوه جمله وويله «تر اوسه پورې مو له طالبانو سره هيڅ ډول خبرې نه دي کړې» چې خپل او د امريکا ۱۷ کلني تبليغات يې په اوبو لاهو کړل، د دوی په چوپړ کې لګيا رسنۍ او ژورنالستان يې په شرمونو وشرمول، خپل چارواکي يې د تل لپاره کاذب راوپيژندل او جالبه دا چې په ذبيح الله مجاهد يې هم ماشومانه ټوکه وکړه، چې ۱۷ کاله يې هسې په هسې د غبرګونونو او ردونو په ليکلو ستړی کړی دی.
بلخوا د ملي وحدت حکومت له واک ته رسيدو راهيسې په لومړي ځل د دغه دولت د دفاع وزير طارق شاه بهرامي رښتيا وويل، چې «هيواد مو له شلو استخباراتي ډلو سره لاس او ګريوان دی؛ ځکه امنيتي تړول لاسليکول ښه کار و».
شک نشته چې هيواد مو له استخباراتي ډلو سره لاس او ګريوان دی، خو دا هم واقعيت دی چې دغه استخباراتي ډلې د همدې دولت د تمويلونکو او د همدې حکومت د چارواکو په هڅو پنځېدلې دي، د دې لپاره چې په هيواد کې د هرج و مرج په رامنځته کولو سره اوبه خړې او ماهيان پکې ونيسي، چې دا خبره د ملي وحدت حکومت د پارلمان د غړو او چارواکو له خولو په ځلونو اورېدل شوې ده.
داسې مې ځکه وويل، چې طالبانو خو خپل استقلال او واک د کمکي اختر په اوربند کې څرګند کړ. د دوی يووالی او وحدت همدې اوربند ثابت کړ او پر ضد يې هغه ټول تبليغات بې بنسټه وښودل، چې ګواکې دوی په ډلو ويشلي او د بهرنيو کړيو لخوا اداره کيږي.
دا چې امنيتي تړون ولس او هيواد ته څومره زيان واړاوه او له اوږدو بدمرغيو سره يې مخامخ کړ، دا جلا بحث دی، خو په ټوله کې يې دولت ته هراړخيزه ګټه کړې؛ ځکه که امريکايان نه وي؛ نو د اشرف غني له قراره، دولت په ظرف د څو اونيو کې سقوط کوي. او له دې علاوه د دولت تمويل او اکمال خو لا جلا لويه ګټه ده.
اميد دی، طارق شاه بهرامي په بل ځلې استجوابي غونډه کې دا رښتيا هم ووايي، چې دغه استخباراتي ډلې ټپلې د کومو دولتي چارواکو د هڅو او ستړياوو برکت دی!؟
او د امريکايي جنرال (لينس بنچ) خبرې بالکل له واقعيت لرې دي. د ده دغه خبره چې د طالبانو ۱۹ مراکز يې ويجاړ او مالي سرچينې يې قطع کړې، دروغ ځکه ده چې د طالبانو په بريدونو کې د کمي پر ځای زيادت راغلی او هره ورځ لسګونه دولتي سرتيري وژني، نيسي او سيمې ترې لاندې کوي، خو دا خبره يې، چې د افغان هوايي ځواک په ملاتړ يې په طالبانو ۱۵۴ بمونه ورولي دي، له يو اړخه رښتيا او له بله دروغ ده.
رښتيا ځکه چې موږ د اوربند له اختر وړاندې د امريکايي او دولتي هوايي ځواکونو د زياتو بمباريو شاهدان و، په کندز، فراه، فارياب، کندهار، پکتيا، ارزګان او هلمند کې يې ګڼ بريدونه وکړل، او دروغ ځکه چې دا ټول بريدونه په ملکي وګړو او هستوګنځايونو شوي دي. لوستونکي کولی شي په يادو او څو نورو ولايتونو کې د ړندو بمباريو له امله رامنځته شوي ملکي تلفات په بيلابيلو بې پرې رسنيو کې وويني.
له ۱۷ کلونو وروسته چې حکومتي چارواکو په رښتيا ويلو پيل وکړ او امريکايي جنرالان لا هم په هماغه مرکب سپاره دي، دا زما لپاره هم د حيرانۍ ځای دی او في الحال يې په سر او بر نه پوهيږم؛ نو ځکه يې لوستونکو ته پرېږدم.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close