غني د رادمنش په وړه خوله لويې خبرې کوي

تميم توفيق
لومړی خو اشرف غني دومره حيثيت نه لري چې په خپله خوله د لويو کارونو فيصله وکړي، په زياته بيا د رادمنش په وړه خوله د ملت تر غوږونو لويې خبرې رسول او د ملت تيرايستلو هيله ترې لرل خو بيخي د سالم عقل کار نه دی، مګر دا پنځه پوټه له غربه راوارد شوی کائنات بيا هم هڅه کوي چې د رادمنش په توسط سلامت حقايق په بله واړوي او ځان مستقل او په فيصلو کې ازاد وښيي.
دا خبره مې تر دې وکړه چې نن رسنيو د خارجي او داخلي ځواکونو لخوا د لرې پرتو او کم نفوذه سيمو د پرېښودو خبر نشر کړ، چې وايي د ټرمپ د ستراتيژي هغه برخه ده چې غږ يې نشته خو عمل يې وليدل شو او راساً د ټرمپ امر دی.
امريکايي او ځينو دولتي چارواکو رسنيو ته ويلي چې دا پريکړه په دې موخه شوې چې امنيتي ځواکونه په لرې پرتو سيمو کې د طالبانو له بريدونو خلاص او ځاني تلفات يې کم شي.
خو رادمنش بي بي سي ته ويلي چې د شاتګ دغه ستراتيژي يې خپله جوړه کړې او عمل هم پرې مخکې پيل شوی دی، دغه راز يې ويلي چې په لرې پرتو سيمو کې به هغه سيمه ييز ځواکونه ځای پر ځای شي چې في الحال د جوړيدو په حال کې دي، نوموړي فراه، هرات، غور، بادغيس، ننګرهار، غزني او پکتيا ولايتونه د مثال په توګه ياد کړل چې دغه ستراتيژي پکې پلې شوې ده.
دا چې دغه پر شاتګ او په لوی لاس د پراخو سيمو پريښودلو ته رادمنش د خپل يو نادر تکتيک نوم ورکوي، رښتيا هم نادره ده، خو خبره دا ده چې مفکر ولې دومره کوچنی او ناپوه دی چې د رادمنش په خوله يې د افغانانو او آن د نړۍ تيرايستلو ته زړه ښه کړی.
په دې ټوله نړۍ يقيني ده چې دغه تکتيک د ټرمپ د ستراتيژي يوه برخه ده. ځيني خلک خو لا په دې آند دي چې ممکن له طالبانو سره يې په ابتدايي ليدنه او خبرو کې د سيمو په پريښودلو پريکړه کړې وي او دا يې د افغانستان د انخلاء لومړی ګام وي.
په هر تقدير، په دې اړه څه ويل به له وخت مخکې خبره وي، خو دا په زغرده ويلی شو چې لرې پرتو سيمو کې په زيات مصرف او محکم ودان شوي پوځي مراکز تخليه کول او خپل ځواکونه د ولاياتو مراکزو ته ورټولول، د غني او رادمنش تکتيک نه، بلکې مجبوريت دی؛ ځکه چې نننی طالب هغه نه دی چې دوه کاله وړاندې و، نننی طالب د غني او رادمنش عسکر وچ په تندي ولي او هيڅ پتلون کړی اواره عسکر/اربکی نشي کولی د طالبانو شپنيو چاپو ته ځان ټينګ کړي.
په دې وروستيو کې موږ مشاهده کړل چې طالبانو په عامو پوستو سربيره سلامتې قرارګاوې ونيولې، پکې ميشت عسکر يې ټول ووژل او ډير يې ژوندي ونيول او د غني لخوا د سيمو د لاندې کولو په هيله ورکړل شوې وسلې او مهمات يې ټول ترې ولجه کړل.
نو دې مشاهداتو او واقعاتو ته په کتلو سره بايد غني ته وويل شي، چې د رادمنش په وړه خوله د دومره لويو پريکړو په ځاني بللو هڅکله د خلکو تيرايستلو هڅه مه کوه، کله به هم څوک درسره ونه مني چې د سيمو پريښودل يو تکتيک او د ولاياتي مراکزو د ساتنې لپاره يو پلان دی.
دا به څنګه د کوم سالم عقل معقوله فيصله وبولو، چې د ولاياتي مراکزو په شاوخوا کې امنيتي او دفاعي پوستې دې تخليه او پکې ميشت عسکر دې ولايت ته انتقال شي، تر څو مراکز له سقوط څخه وژغوري!!!
حقيقت دا دی چې نور دولتي عسکرو د طالب په وړاندې د مقابلې توان له لاسه ورکړی او نشي کولی د خپل بادار په لاس ورته ودانو شويو محکمو ځالو کې اقلا خپل ځان خوندي او له مرګه وژغوري.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close