فاریاب کې د افغان ځواکونو هاوان مرمۍ ملکي وګړو ته مرګ ژوبله اړولې

کابل ټکی کام ۱۰سلواغه/۱۳۹۴، احمدالله مهاجر
زمونږ همکار خبر را کوي چې د فاریاب ولایت د پښتونکوټ ولسوالۍ په کلا ګډا سیمه کې پر دوو کورونو د هاوان مرمۍ لګېدلې ده چې له کبله یې ۱ ښځه وژل شوې او ۳ تنه نور ټپيان دي.
زمونږ همکار د ځايي خلکو له قوله وايي، «تېره شپه د هاوان مرمۍ هغه مهال د خلکو پر کورونو ولګېده چې د طالبانو او افغان ځواکونو تر منځ جګړه وه، د امنیتي ځواکونو له لورې مرمۍ راغله او د خلکو پر کورونو ولګېده.»
د فاریاب والي انور سادات د یادې پېښې په تأیید کې وايي، لا نه ده مالومه چې مرمۍ له کوم لوري د خلکو پر کورونو توغول شوې ده.
د یادولو ده چې امنیتي ځواکونو مخکې هم په هلمند کې پر یوه کور چې پکې د واده مراسم ترسره کېدل، توپونه ویشتلي وو، چې د ناوې او زوم په ګډون لږ تر لږه ۱۵۰ کسانو ته مرګ ژوبله پکې اوښتې وه، همدا شان د وردګو په اوتړیو نومي کلي کې یوه جومات ته څېرمه د امنیتي ځواکونو له لورې د توپونو په ویشتو سره ۱۷ کسان وژل شوي وو چې قاتلین یې ونیول شول، خو سزا لا هم نه ده ورکړل شوې.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close