لنډه کیسه او ګټې یې: توره جنتي میرمن

حامد افغان

د امام بخاري او امام مسلم رحمهما الله په روایت د یوې تورې جنتي میرمنې کیسه درته راژباړم، او له دې کیسې نه ترلاسه شوې ګټې او فایدې ورپوري تړم، عطاء بن ابي رباح رحمه الله وایي: عبدالله بن عباس رضي الله عنهما راته وویل: جنتي ښځه در ونه ښیم؟ ما ورته وویل: هوکي، ده راته وویل: دا توره ښځه رسول الله صلی الله علیه وسلم ته راغله ورته ویې ویل: زه (د ناروغي یا پیریانو لامله) بې هوښه کیږم او لوڅېږم له الله نه دعا راته وکړه، رسول الله صلی الله علیه وسلم ورته وویل: که دي خوښه یي صبر وکړه جنت به وګټې او که غواړې دعا به درته وکړم چې روغه شې، هغې وویل: صبر کوم خو دا دعا راته وکړه چې لوڅېږم نه، نو هغه دعا ورته وکړه.

عن عطاء بن أبي رباح قال: قال لي ابن عباس رضى الله عنهما: ألا أريك امرأة من أهل الجنة؟ قلت بلى! قال: هذه المرأة السوداء أتت رسول الله صلى الله عليه وسلم فقالت: إني أصرع وإني أتكشف فادع الله لي. قال: إن شئت صبرت ولك الجنة، وإن شئت دعوت أن يعافيك، قالت: أصبر ولكن ادع الله أن لا أتكشف. فدعا لها. [رواه مسلم و البخاري: 5328].

د کیسې ګټې او فایدې

1– د الله د رضا او جنت ترلاسه کولو یواځنی معیار له الله نه وېره او تقوا ده، دلته حسب، نسب، تور او سپین او نورو رنګونو خبره ځای نه لري.

وي د خلکو اختلاف تل په رنګو کې

وینه یوه ده په بدن د تور او سپین

2 – له کیسې نه معلومولی شو چې دې تورې میرمنې د الله په نزد څومره لوی کرامت او شرافت لاره چې د الله رسول صلی الله علیه وسلم په دنیا کې د جنت زیری ورکړ!! .

3 –له کیسې نه د ناروغي یا پیریانو لامله بې هوښه کیدل هم ثابتیږي، دا دوه ډوله ده یو د ناروغي له کبله طبیعي او بل د پیري په اثر بې هوښه کیدل دي.

4 – د تورې میرمني له پاره دا ډېره مهمه وه چې لوڅه او بې حجابه نه شي، او له دې نه د حجاب اهمیت څرګندیږي.

5 – له بل چا نه د دعا غوښتلو جواز.

6 – مومن سړی او مومنه ښځه که د الله له لوري په ورپېښ مصیبت صبر وکړي جنت یې وګاټه.

7 – دا نیکمرغه میرمن د الله د جنت له پاره د دنیا دومره سختي او ناروغي ته غاړه ږدي چې د هغه لامله بې هوښي پرې راځي! .

8 – د ایمان خاوندانو ته د الله د رضا او جنت په مقابل کې د دنیا ستونزي او سختي اسانه وي.

9 – دا جنتي میرمن د دې په غم کې ده چې پرده یې خوندي وي که څه هم د بې هوښي په حالت کې وي .

10 – له کیسې معلومیږي چې صحابه کرامو به خپلو شاګردانو ته د خپلو نرو او ښځو نېکانو کیسې کولې او په دې توګه به یې هغوی ښو عملونو ته هڅول.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close