له بدنامو ملا شکلو د نيکنامې سولې اميد!!!

تميم توفيق
د علماؤو په نوم د يو شمير ملا شکله درباريانو يو شمېر بې معنی غونډو ته په کتلو به هيڅ افغان د دوی د راتلونکو غونډو په توسط د سولې راتلو تمه ونه لري؛ ځکه چې موږ وليدل چې دا خلک په ځلونو راټول شول، خو بې له دې چې په درباريتوب او د امريکا استعماري موخو ته په تحقق بښلو ځان بدنام کړي، هيڅ ګټه يې ونکړه.
اوس عام افغان ولس متيقن دی چې دغه د علماء کرامو په نوم راټوليدونکي خلک ګردسره د واقعي سولې غوښتونکي نه دي، بلکې يوازې د دربارونو خوشحالولو او د ډالرونو ترلاسه کولو په اميد د زمکنيو واقعيتونو په تحريفي تعريف بوخت دي.
دا خبرې مې د کابل ادارې د چارواکو تر هغو موافقو رايادې شوې چې وايي کابل کې يې د پاکستان د بهرنيو چارو له وزير سره د پاک افغان علماؤو په غونډو موافقه کړې، ويل کيږي چې په دې موضوع يې له توافق وړاندې خورا لوی بحث هم کړی دی.
درباري ملا طوره خلک له دې وړاندې په اندونيزيا، کابل او د سعودي هيواد په جده ښار کې هم سره راټول شوي وو، دوی د درې ځله هڅو په نتيجه کې هغه څه ترلاسه نه کړل چې د دربارونو لخوا يې ترې هيله کيدله، بلکې يوازې يې خپلې اصلي څېرې خپل پاک زړي ملت ته څرګندې کړې.
افغانانو ته «سوله» خورا ډير پاک نوم دی، چې په هيڅ صورت يې د دغسې بدنامو څېرو په توسط د راتلو او ليدو تمه نه لري او نه دې بل څوک دا تمه لري، چې د اشغال په شتون کې به يې د رښتينې سولې په نوم د مطلق ارامي په اوازو تير باسي. بس کټ مټ لکه درباري ملا شکله خلک چې له افغان ولس څخه د علماؤو په نوم کې نشي پټېدلای، دغه راز يې څوک د رښتينې سولې په پرده کې نورې شومې موخې هم له سترګو نهام کولی نشي.
زه د يو عام افغان په صفت د دواړو غاړو له واقعي علماء کرامو هيله لرم چې په دغسې بدنامونکو غونډو کې په ګډون کولو سره خپل علمي حيثيت ته زيان ونه رسوي؛ ځکه چې په دغسې غونډو کې د امريکايانو لخوا د افغانستان اشغال ته، چې د ټولو اسلامي او غير اسلامي نورمونو خلاف دی، د جواز ورکول هڅه کيږي او هغو ظالمانو او قساوتګرو ته، چې د ګردو اسلامي او بين المللي قوانينو خلاف پر افغانانو د ظلم چپه مېچنې چلوي، برأت ورکول کيږي.
که دوی په دې مهملو او بې ګټې غونډو کې ګډون وکړي، خدای مکړه نه يوازې به د عام ولس په منځ کې له ځان څخه د «امريکايي مفتي» نوم په لرې کولو ستړي شي، بلکې د “من أعان ظالما سلطه الله عليه” مصداق به هم وګرځي.
په دې کې شک نشته چې دغه غونډې د افغانستان د اشغال د پايښت او د امريکايي بشرخورو او داخلي لاسپوڅو د برأت په موخه ترسره کيږي او د دې لپاره دائريږي چې د دوی په وړاندې د روانې برحقې جهادي مبارزې رنګ پيکه او آن ناروا يې معرفي کړي. نغوذ بالله. په دې کې هم د شک ځای نه پيدا کيږي چې په دې غونډو کې اشتراک له ظالم سره د مرستې دوهم نوم دی؛ ځکه چې موږ له تيرو ۱۷ کلونو څخه په افغان ولس د امريکايانو او د هغوی د ملاتړو له لوري د داسې ظلمونو شاهدان يو، چې د نننۍ پيړۍ په درسته نړۍ کې يې بيلګه نشو موندلی؛ نو چې د ظالمو اشغالګرو يرغل برحق او روا وبلل شي، دا به بله څه معنی ولري، فلهذا واقعي علماء کرام بايد د دورخ غاړې ته له ورتلو ځان وساتي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close