له سورهاک وروسته د بلک هاک ازمايښت

سرليکنه

هغه انګرېز چې له لمر ختو تر پرېوتو یې مستعمره درلوده خپل پوځونه او ډول ډول وسلې یې پر افغان ولس وازمايلې. همدارنګه، صفويانو هم د تېري او يرغل زړونه پر افغانستان يخ کړل، خو ارمانونه یې نيمه خوا پاتې شول. له هغه وروسته چې روسانو په افغانستان کې کومې وسلې او روزل شوي پوځونه وازمايل، چرچل او مکناټن هم نه وو ازمايلي. خو له نېکه مرغه، هر تېري کوونکي چې د افغانستان پاکې او مقدسې خاورې ته د تېري په نظر کتلي، غاښ ماتي او سر ماتي له افغانستانه تښتېدلی دی.

روسانو چې د کابل پر هوايي ډګر د لومړي ځل لپاره ګن شيپ هلیکوپترې کوزې کړې، وطن پلورو کمونستانو ورته د خوښۍ نڅاوې وکړې چې نور به د دې هليکوپترو په وسيله د مجاهدينو سنګرونه بمبار او په بشپړه توګه به له منځه وړل کېږي. ګن شپ هليکوپترو په بمبار کې ځانګړی نوم درلود، خو د مجاهدينو په مقابل کې یې ګټلی نوم بايلود.

کله چې یادو هليکوپترو بمبار پیل کړ، کمونستانو به ويل، ”دا د سره لښکر هليکوپترې دي. سرې لمبې یې مخالفين له منځه وړي، او له سرې ماڼۍ رالېږل شوې دي چې د سرو لښکرو د کاميابيو لپاره پر دښمن سره اورونه بل کړي. “

ځینو روسي تالي څټو، چې په روسيه کې  یې پوځي زدکړې کړې وې، به ويل: ”سرې هليکوپترې د افغانستان د سره انقلاب ساتونکې دي.“

دا چورلکې به چې هوايي ډګر ته له عملياتو راستنې شوې، سره بيرغونه به یې په څرخونو پورې تړلي وو چې له امله به یې هوايي ډګر تک سور شو .

په افغانستان کې د امریکا په مشرۍ د مېشتو نړیوالو ځواکونو د قوماندانۍ، یا غوڅ ملاتړ ماموریت، په خپره شوې خبرپاڼه کې ويل شوي د افغان هوايي ځواک اړوند ۳۱ منسوبینو، د بلک هاک هلیکوپترو د روزنې په برخه کې د فراغت اسناد ترلاسه کړي او په هلمند کې یې د لومړي ځل لپاره په عملياتو کې برخه واخیسته.

 د امريکايي جنرال په وینا، دوی په دې وياړي چې په عملياتو کې یې ورسره برخه هم اخیستې ده.

د هلمند په عملیاتو امريکايي جنرال، پیلیپ سټیوارټ، کټ مټ هغه خبره وکړه کومه چې روسي قوماندانانو کمونستي نظاميانو ته کوله. هغوی به کمونستانو ته ويل: ”په دې وياړو چې د اکتوبر د انقلاب پايلې به په افغانستان کې ګورو.“

روسي جنرا لانو به ويل: ”موږ د اکتوبر انقلاب د سره پوځ په مرسته کامياب کړی؛ سور پوځ، د سره پوځ وسلې، د سرې ماڼۍ قومانده او د سرو هليکوپترو عمليات به له سور کمونستي انقلابه دفاع کوي.“

سور انقلاب! د کمونستانو په اصطلاح یې ورته ”پر شا نه تلونکی انقلاب“ وايه – هغه ”پر شا نه تلونکی انقلاب“ چې د افغانستان مجاهد ولس په تورو، کوتکو او دانپورو ټوپکو پر شا تللو ته اړ کړ.

اوس امريکايي جنرال، پیلیپ سټیوارټ، په هلمند کې افغان پوځيانو ته د بلک هاک ډاډ ورکوي چې همدا چورلکې به په کابل کې د جان کېري له حکومته دفاع کوي.

ګاونډيانو، د سيمې هېوادونو او نړيوالې ټولنې منلې چې روسانو په افغانستان کې له خپل ټول ځواک څخه په استفاده عمليات کول او له سره پوځ او سورهاک هليکوپترو یې کار اخیست؛ خو همدا افغان مېړنی او مجاهد ولس ؤ چې د هېواد په هره سيمه کې یې د روسي وحشيانو سورهاک څرخکې نسکورې کړې.

افغانستان ته د امريکا له اپاچي څرخکو وروسته د بلک هاک لومړۍ جوپه نږدې اته مياشتې د مخه رارسېدلې ده او نورې بلک هاک به هم امريکا افغان حکومت ته ورکړل شي. خو سره له ټولو پوځي وسايلو، د کابل په شمول ټولو ولاياتو کې پر دولتي مرکزونو د بريدونو مخه نشي نيولاى او ورځ تر بلې د هېواد په مرکز او ولاياتو کې پر حکومتي پوليسو او بهرنيو ځواکونو د طالبانو لخوا جنګي کړۍ راتنګېږي.

افغان دفاع وزارت او په افغانستان کې د بهرنیو پوځونو قومندانان په دې ډاډه دي چې افغان پوځ ته مو د نورو جنګي وسايلو تر څنګ ١٣ بلک هاک څرخکې ورکړې دي او تر هلمند وروسته به په نورو ولاياتو کې هم عمليات ترسره کړي. خو دا چې د کابل زړه نا ارمه دى او په کابل کې د بريدونو مخه نشي نيولاى، په نور ولاياتو کې به بلک هاک څه وکړي؟

په افغانستان کې چې د افغان مؤمنو مجاهدينو په مقابل کې د مسکو سورهاک ناکامې شوې، د امريکا بلک هاک هم ناکامې دي. د بهرنيو پوځونو او بلک هاک په ډاډ هم دفاع وزارت له طالبانو هغه سيمې بېرته ونه نيولې کومې چې یې دمخه ترې نيولې دي.

جګړه په سورهاکو او بلک هاکو نه ګټل کېږي؛ جګړه په ايمان، قوت، حوصله او ایماني غيرت ګټل کېږي. سورهاکو په افغانستان کې خپل زور وازمايه، اوس یې بلک هاک هم ازمايي. بلک هاک به هم د افغان مجاهد ولس لخوا په هغه برخليک اخته کړل شي له کوم سره چې سورهاک مخ شوی و.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close