له کندهاره د سولې غږ

د سولې غږ چې له هرې خواوي دافغانانو په ګټه دی او هرڅوک چې په سوله کې مرسته وکړي هغه به د افغانانو ریښتینی خواخوږی وي چې په افغانستان کې د۳۶کالوراهیسې روانه جګړه پرې پاې ته رسیږي هغه غږ په هرافغان خوږ لګیږي.

د کندهار شورا د جنګ له دواړو ښکېلو خواو غوښتي، چې نور له جګړو لاس واخلي او د وژلوپرځای دی د سولې لپاره هڅې پیل کړي، که څه هم د کندهار د شورا خبره د حکومت له کوره یو غږ دی، چې که د مرکز په نمایندګۍ وي او که د کندهار د شورا خپل غږ وي، خو دافغانانو لپاره ګټور غږ دی.

د ۲۰۰۱کال راپدیخوا چې امریکا پر افغانستان یرغل کړی دی او هره ورځ دافغانانو له کورونوپه عملیاتو او بمباریوسره جنازې باسي د۱۵کالو په تيرېدو سره دکندهار دشورا خولې د موچي په رینه ګنډلې وې او که د بهرنیوهوایي ځواکونو لخوا ورته دافغانانو په کورونو، جوماتونو، ودونو او جنازو بمبارۍ نه ښکاریدې، چې د ودونو په مراسموکې ېې هم د ودونو په خوشحالیو راټول شوي افغانان د مرګونو په ویراخته کړل.

په هرحال که په تیرو ۱۵کالو کې د کندهار شورا کڼه وه او که ړنده خو اوس ېې سترګې وغړیدې، چې پرښکېلودواړو خواو حکومت او ‌طالب وسله والو ېې غږ وکړ، چې د سولې لپاره هڅې پیل کړي، خو دا هڅې به څرنګه او څوک پیلوی؟

د کندهار شورا اوس پدې پوهه شوه، چې په افغانستان کې د جګړې قربانیان افغانان او ګټې ېې نورو ته رسیږي ښه خبره ېې کړې ده، خو کاش دا خبره او غږ ېې ۱۵کاله دمخه کړی وای، کاش دمخه د کندهار شوراپه دې پوهیدلې وی، چې د جګړې قربانیان افغانان او ګټې ېې نورو ته رسیږي.

د کندز پربې ګناه ښځو،نارینه او ماشومانو چې حکومت او د بهرنیو هوایي ځواکونو پرې بمبار وکړ او پکې ېې دګلونوپه شان ماشومان شهیدان یواځې دافغانانو نه بلکې دټولې نړۍ کرکه او نفرت ترې پیداشو ، ښه شوه چې د کندهار شورا له ۱۵کلن خوبه راویښه شوه، ويې ویل دواړه خواوې دې د جګړې پرځای د سولې هڅې پیل کړي.

د کندهار دشورا یا د ملي یووالي په نوي نامه دنوې غونډې ګډونوالو څرنګه په تیرو ۱۵کالو کې په هیواد کې د حکومت او بهرنیوپوځونو وحشي وژنې وزغملې او څرنګه ېې تراوسه پورې ځانونه په داډول وژنو او وحشتونو خاموشه کړي وو؟

تیرکال چې په کندز کې پرروغتون بهرنیانو بمباري وکړه او پکې ېې پنځوس ډاکټران او دروغتون کارکوونکي شهیدان کړل په هغه میاشت کې د کندهارشورا د کال په خوب ویده وه او که ېې افغانی احساس نه لاره .

له کندهاره د سولې غږ دافغانانو لپاره یوښه زیری دی، کندهار د ډیرو ستروکارنامو ډک ولایت دی احمدشاه بابا له کندهاره دیوې لوېې جرګې په وسیله دافغانانو په رایه د هیواد ډوبیدنکې بیړۍ له ګردابه وژغورله .

د هیواد په اړه سترې پریکړې له کندهاره شوي دي ، کندهار و چې د ټول هیواد د حکومتولۍ لارښوونه به ترې کیده خو هغه وخت به له کندهاره چې کوم غږ وشو، هغه د کندهار داوسیدونکو خپل غږ او له کندهاره غږ پورته کوونکي کې به د خپل نظرخاوندان وو، چې د هیواد هرې برخې ته به ېې خپل غږ رساوه .

اوس خو په کندهارکې ولایتي چارواکي په خپلوکې سره  د نظر یووالی نه لري، دوی به دواړه خواوې څرنګه له جګړې را وګرځوي او سولې ته به ېې راوبلي.

که په رښتیا سره د کندهار د شورا دا غږ خپل غږ وي او دزړه له تله ېې دا غږ پورته کړی وي، نو په ټول هیواد کې دې د خپل غږ پلویان له ځانه سره ملګري او په ټول هیواد کې دي دسولې هڅې پیل کړي، ټول افغانان له جګړې کرکه لري او د سولې غوښتونکي دي.

ټول افغانان دکندهار د شورا دغږ هرکلی کوي ، ملاتړ ېې کوي خو د کندهار شورا دې دومره وکړي، چې په کندزکې دې د تیرې ورځې د بمباریو او شهیدانو پوښتنه وکړي، چې په کوم جرم دا معصوم ماشومان شهیدان کړل شول؟ دا جرئت دې هم دکندهار شورا وکړي، بیابه بهرنیان پوهه شي، چې په افغانانو کې زموږ څخه د وژلوکسانو دپوښتنې څوک شته، بیابه د جګړې پرځای سولې ته لاره پیداشي.

دکندهار شورا تراوسه پورې په افغانستان کې د جګړې پیل کوونکي نه دي پیژندلي، د جګړې دبندښت او سولې د راوستلو غوښتنه باید له هغه چاوکړل شي، څوک چې په افغانستان کې د جګړې قومانده په لاس کې لري اود جګړې پرځای سوله راوستلی شي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close