لوړو زده کړو وزارت پر محصلې جنسي تيري د تورن استاد نيول تاييد کړل

(کابل ټکی کام، ۱۳۹۷، زمری ۳)

د افغانستان د لوړو زده کړو وزارت تاييدوي چې د کابل پوهنتون پر يوې محصلې په جنسي تيري تورن استاد شجاع الدين خراساني نيول شوی دی.

د یاد وزارت وياند محمد ضيا ساحل وايي، د کابل پوهنتون د ادبياتو د پوهنځي استاد د ملي امنيت ځواکونو نيولی او پلټنې ترې روانې دي.

ساحل که څه هم د ياد استاد د کړي جرم په اړه څه ونه ويل خو تر دې مخکې ځينو سرچينو راپورونه ورکړل چې د ښوونې او روزنې پوهنتون استاد شجاع الدین خراساني ادبیاتو پوهنځي کې له یوې زده کړیالې سره د جبري جنسي تیري پر مهال نیول شوی دی.

د کابل پوهنتون يو محصل او عیني شاهد خالد صميم وايي، پېښه يې په خپلو سترګو ليدلې چې د امنيت اړوند څو کسانو شجاعي له خپل دفتره په نيم لوڅ بدن د پوهنتون تر عمومي دروازې راوويست.

د لوړو زده کړو وزارت د چارواکو په وينا، له پلټنو وروسته به د دغه خبر د تصدیق یا رد په اړه جزيات وروسته خپاره شي.

د افغانستان په دولتي دفترونو کې له ښځو سره د جنسي زور زياتي راپورونه تر دې مخکې هم ورکول شوي خو دا لومړی ځل دی چې په کابل کې د پوهنې وزارت له اړوند پوهنتون څخه دغه ډول راپور ورکول کېږي.

څه موده مخکې د ولسمشر غني مېرمن رولا غني ويلي و، په دولتي او خصوصي ادارو کې پر نورو ځورونو سربېره ښځينه کارکوونکې له جنسي ځورونې سره مخ دي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close