لوګر: د بهرنيو ځواکونو په بمبار کې اووه ملکيان وژل شوي

(کابل ټکی کام، ۱۳۹۷، زمری ۸)

د لوګر ولايت په محمداغې ولسوالۍ کې بهرنيو ځواکونو د ولسي خلکو پر ميشت ځايونو بمباري کړې چې په ترڅ کې يې اووه ملکي وګړي وژل شوي دي.

ځايي اوسېدونکي وايي، سيمې ته ګډ ځواکونه د عملياتو په موخه راغلي و چې د طالبانو له غبرګون سره مخ شول زياتوي وروسته افغان ځواکونو له بهرنيانو د هوايي مرستې غوښتنه وکړه چې د هغوی د بمبارۍ له کبله ياده پېښه رامنځته شوه.

دغه بمباري تېره ورځ د يادې ولسوالۍ مربوط د زرغون ښار په سيمه کې شوې ده.

د سيمې يو تن اوسېدونکي احسان لوګری وايي، په بمبارۍ کې څلور ماشومان او درې لويان شهيدان شوي او دوه تنه نور ټپيان دي.

نوموړی زياتوي، په دغه هوايي بريدونو کې د خلکو کورونه هم زيانمن شوي دي.

د روانې مياشتې په لومړيو کې هم ګډو ځواکونو د دغه ولايت په مرکز بابوس سيمه کې د شپنيو عملياتو پر مهال بمبارۍ وکړې چې په ترڅ کې يې څلور کورونه په بشپړه توګه ويجاړ او څوارلس تنه ملکي وګړي پکې ووژل شول.

په وروستيو کې بهرنيو ځواکونو د هېواد په بېلابېلو سيمو کې د هوايي بريدونو پر مهال ملکي وګړي په نښه کړي چې يوه بېلګه يې څه موده مخکې د کندوز ولايت په چهاردرې ولسوالۍ کې د درې کورونو بمبارول و چې له شلو زيات ملکي وګړي پکې ووژل شول.

ډيری وخت په هوايي بريدونو کې د ملکي خلکو پر وژل کېدو بهرنيان او حکومت يواځې د پلاوي په ټاکلو د پېښې د پلټنې ژمنې کوي چې وروسته بيا ورته ډول پېښې شوي او هيڅ ډول مخنيوی يې نه دی شوی.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close