لوګر –کاپيسا: په عملياتو او ډرون بريد کې ملکيان وژل شوي دي

(کابل ټکی کام، ۱۳۹۷، لیندۍ ۴)

د لوګر د ولايتي شورا مرستيال عبدالوي وکيل وايي، تيره شپه افغان ځانګړو ځواکونو د دغه ولايت په پادخواب شاهانه سيمه کې د عملياتو پر مهال ملکي خلک وژلي او ځينې يې له ځان سره بنديان کړي دي.

د عبدالوکيل په وينا، په دغه عملياتو کې څلور ملکي وګړي وژل شوي او يو شمير نور يې ځان سره د بنديانو په توګه وړي زياتوي چې وژل شوي او نيول شوي کسان ملکيان دي او هيڅ وسله والې ډلې سره يې اړيکې نه لرلې.

نوموړی وايي، عملياتي عسکرو د عامو خلکو کورونه ويجاړ کړي او ډيری خلک يې وهلي ډبولي هم دي.

خو د لوګر امنيه قومندانۍ وياند شاه پور احمدزی بيا وايي دغه عمليات د صفر يو قطعې ځواکونو کړي چې په ترڅ کې يې شپږ طالبان وژل شوي دي.

دغه راز د کاپيسا ولايت څخه راپورونه وايي، چې تيره شپه بهرنيو ځواکونو د تګاب ولسوالۍ په نوروزخيلو سيمه کې د ډرون د عامو خلکو په کورونو د ډرون الوتکې بريدونه کړي چې د ماشومانو په ګډون پکې پنځه تنه وژل شوي دي.

د تګاب اوسېدونکي وايي، هغه بمبار چې تيره شپه شوی پکې د د درې ماشومانو په شمول پنځه تنه عام خلک وژل شوي دي.

د يادونې ده، چې تيره ورځ هم بهرنيو ځواکونو د کندهار ولايت شاوليکوټ ولسوالۍ په المش سيمه کې د واده پر مراسمو بمبار وکړ چې په ترڅ کې يې نهه تنه عام خلک ووژل شول او يو شمير نور ټپيان شول.

په وروستيو کې د افغان او بهرنيو ځواکونو عملياتو کې تر ډيره ملکي خلک د بريدونو او شپنيو عملياتو هدف ګرځي چې تر اوسه يې د بشري حقونو ادارو او د افغان حکومت چارواکو يې په اړه هيڅ غبرګون نه دی ښودلی.

په عين حال کې د ولسي جرګې غړي وايي، چې د ګډو ځواکونو په عملياتو کې تر ډيره ملکي خلک ښځې، ماشومان وژل کېږي او کورونه يې نړول کېږي خو زياتوي چې په دې اړه يې حکومت هيڅ غږ نه اوري.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close