ما ولي اسلام قبول کړ؟

(دويمه برخه)

په امريکا کې د مسلمانانو شمېر له ۶۰ څخه تر ۸۰ لکو پورې ښودل کېږي، خو د برتانيا داير‌ه المعارف (انسايکلوپيډيا آف برټانيکا) په حواله د مسلمانانو شمېر ۸۰ لکه حساب شوی، چې هر کال ۳۵۰۰۰ نوي مسلمانان ورسره اضافه کېږي.

په امريکا کې اسلام په زندانونو کې ډېر زيات خپرېږي، اوس په زندان کې د اسلام د قبلوونکو شمېر له درې لکو څخه اوښتی دی، د يوې سروې له مخې هر کال په زندانونو کې نږدې (۳۵۰۰۰)کسان اسلام قبلوي، د امريکا يه يو زندان کې چې (۳۰۰۰) کسان په کې وو ۹۰۰ کسانو يې اسلام قبول کړ.

يوې هندوستانۍ ورځپاڼې يو راپور خپور کړی، چې په امريکا کې په ۱۹۹۰ م کال د مسلمانانو شمېر پنځه لکه وو، خو په ۱۹۹۸ کال کې يې شمېر ۶۰ لکو ته ورسېد، يعنې په اتو کلونو کې ۵۵ لکه کسانو اسلام قبول کړ، په امريکا کې په کال ۱۹۹۳ م کې د کاتوليک عيسايانو شمېر پنځوس ميليونه وو، خو تر ۱۹۹۸ م کال پورې يې شمېر ايله شپېته ميليونو ته ورسېد، يعنې په ۲۵ کالو کې لس ميليونه زيات شوي وو،

همدا ورځپاڼه ليکي، چې په امريکا کې په څوارلس کلونو کې مسلمانان لس لکه زيات شوي، دا ورځپاڼه ليکي، چې د نويو مسلمانانو دشمېر د زياتوالي علت او دليل د امريکايي نجونو نکاح او واده کول دي، له مسلمانانو سره؛ ځکه امريکايي نجونې وايي چې مسلمان خاوند وفادار وي.

امريکايي ورځپاڼې نيويارک ټايمز ليکلي دي، چې په امريکا کې د مسلمانانو شمېر د پروتستانت عيسايانو څخه يو نيم په سلو کې زيات دی، د امريکا نامتو ورځپاڼې کرسچين ساينس مانيټر هم ليکلي دي، چې اسلام د نورو مذهبونو په نسبت په امريکا کې په تېزۍ سره خبرېږي، او په تېرو پنځو کلونو کې ۱۲۰۰ جوماتونه اضافه او نوي جوړ شوي دي، په امريکا کې په زيات شمېر سره مېرمنې اسلام قبلوي، ديني بليک چې يوه هندۍ امريکايۍ ده، په ۱۹۹۷ کال کې يې اسلام قبول کړ، ديني بليک د نورو لوېديځو مسلمانانو په شان تر پوره غور، تحقيق او پلټنې وروسته اسلام قبول کړ، هغه پخپله وايي، چې ما خپل مذهبي ژوند د کاتوليک عيسايت څخه پيل کړ، بيا مې بودايي مذهب ومنلو، بيا په يوه بله عيسايي ډله کې شامله شوم، صداقت لټوونکې ته به هيڅ ځای کې ډاډ په نصيب نه شو، نو هغه اسلام ته رانږدې شوه، هغه وايي، بالآخره الله ج ما ته سمه او نېغه لاره وښودله.

په ۱۹۹۷ م کال د مارچ په مياشت کې هغې اسلام قبول کړ، او څه وخت وروسته د هغې خاوند هم مسلمان شو.

د امريکا په افريقايي نژادو کې اسلام ډېر په تېزۍ سره خپرېږي، تر اوسه چې څومره خلک مسلمانان شوي دي، په هغوی کې ډېره برخه د افريقايي نژادو امريکايانو ده، داسې وړاندوينه شوې چې، ډېر ژر به امريکايانو لوی دين اسلام شي، چې دا اوس هم لوی دين دی. د امريکا يوې ورځپاڼې (يو اې ټو ډي) ليکلي دی، چې تر اوسه پورې ۲۵ لکو تورپوستو اسلام قبول کړی دی، داسې ويل کېږي، چې په راتلونکو دوه لسيزو کې به د تورپوستو تر ټولو لوی دین اسلام وي، په امريکا کې د تورپوستو شمېر نږدې ۳۵ ميليونو ته رسېږي، په تېرو لسو کلونو کې چې څومره خلکو اسلام قبول کړی د دې څخه اندازه کېدای شي، چې اسلامي ادارې په خپلو هدفونو کې بريالۍ  شوي دي، پخوا د امريکا په يهودي او مسيحي ټولنه کې اسلام په سمه توګه چا نه معرفي کړی، او وړاندې کړی، ځکه نو د خلکو معلومات د هغې په هکله بلکل کم وو، په وروستيو کلونو کې ډېرې ادارې منځ ته راغلې چې هغوی د امريکا د اسلامي خپرواي ادارې (کونسلر اف امريکن اسلام ) سره اړيکې ونيولې او د امريکا خلکو ته يې په سمه توګه اسلام وړاندې کړ، د امريکا د مسلمانانو اتحاد (امريکن مسلم الانس) د امريکا مسلمانان سياسي ډګر ته راووېستل، غواړي په امریکا کې اوس نږدې دوه زره جوماتونه، اسلامي مرکزونه او ښوونځي شته، د هندوستان يوې ورځپاڼې د جوماتونو شمېر څلورزره ښودلی دی.

په امريکا کې په لومړي ځل په کال ۱۹۱۵ ز کال کې د بيډفورد په سيمه کې يو جومات جوړ شو، چې د هغې څخه وروسته د جوماتونو شمېر مخ په زياتېدو شو، په لاس انجلس کې د يو لوی جومات ډبره کېښودل شوه، چې ۷۲۰۰ کېلو متره مربع مساحت يې درلوده او نږدې اته ميليونه ډالر پرې مصرف شول.

نا مسلمان خلک جوماتونو ته رابلل کېږي، تر څو د اسلام په هکله ورته اړين معلومات وړاندې کړي. د امريکا د بحري ځواکونو د يو څارواکي په وينا د امریکا په پوځ کې تر اوسه پورې ۱۸۰۰۰ وګړو اسلام قبول کړی دی، يوازې په بحري ځواکونو کې تر اتو زرو زيات مسلمانان شتون لري.

په شمالي امريکا کې په کال ۱۹۹۳ م کې (د اسلامي دعوت مرکز) جوړ شو، چې مشر يې علي عزام دی، د هغه وینا ده، چې هره ورځ د اوسط په ډول څلوېښت ليکونه مرکز ته رارسېږي، چې مسلمان او نامسلمان د دين په هکله معلومات غواړي، او مرکز هغوی ته اړين معلومات ورکوي، تر اوسه پورې لسو لکو کسانو ته د دې مرکز له لوري اسلامي خپرونې وررسېدلي دي، علي عزام وايي، چې په امریکا کې کوم هسپانوي، خلک اوسېږي، هغوی په ډېر شمېر کې د اسلام لوري ته راګرځي او لامل يې شايد دا وی، چې هغوی د مسلمانانو له هغه نسل څخه دي، چې په زور او جبر سره عيسايان کړای شوي وو، د همدې لپاره موږ په هسپانوي ژبه خپل معلومات خپروو.

 د واشنګټن پوسټ يو مقاله ليکوونکي (کريس جينکنز) په لاتيني امريکا کې د اسلام د خپراوي درې لاملونه په ګوته کوي، هغه ليکلي:

۱- د اسلام پيروان نېغ په نېغه د خپل خالق او رب سره اړيکې نيسي او په منځ کې کومې رابطې او واسطې ته اړتيا نه لري، حال دا چې په عيسايت کې د پاپ او پادري څخه پرته څوک اړيکې نه شي نيولای، ټول واک او اختيار مذهبي مشرانو په لاس کې اخيستی دی.

۲- په مسلمانه ټولنه کې چې د مرستې، اتحاد، ټولنيزتوب او مساوات کوم شکل او صورت موندل کېږي، په ځانګړي ډول کورنی نظام دا ټول شيان د لاتيني امريکايانو لپاره د تشويق، ترغيب او راښکون لاملونه دي.

۳- د مسلمانانو سره تر اړيکو او ناستې پاستې څخه وروسته د امريکا اوسېدونکو ته اسلام په سمه توګه معرفي شو، نو د هغوی ميلان خپله ورسره پيدا شو او زياتوالی په کې راغی، د مقاله ليکونکي په وينا اوس د قرآن مجيد او نورو ديني کتابونو د ژباړې لپاره ادارې جوړېږي، د اسلامي دعوت او بلنې لپاره ادارې او انجمنجونه برابرېږي، چې له دې جملې څخه په واشنګټن کې د لاتيني امريکا د مسلمانانو اتحاد (دي اسيوسي ايشن آف لېټن امريکن مسلم) ډېر زيات کار او فعاليت کوي، په هسپانوي ژبه د (صوت الاسلام) د اسلام غږ پنځلس ورځنۍ مجله هم خپرېږي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close