طالبان: امریکایي ځواکونو د ’داعش ژغورنې‘ عملیات پیل کړي

(کابل ټکی کام ۱۳۹۷ وږی ۲)

طالبانو یو ځل بیا ادعا کړې چې امریکایي ځواکونو د هېواد په ختیځو برخو کې د داعش د وروستیو سنګرونو د حمایت او ساتنې په موخه د دوی پر ضد خپل عملیات ګړندي کړي.

طالبان وایي، هرڅومره چې دوی د داعش پر وړاندې خپل عملیات چټکوي، په مقابل کې یې امریکایي ځواکونه د داعش په ملاتړ د جنګېدونکو طالبانو پر لومړیو کرښو خپلو بمباریو ته زور ورکوي.

طالب ویاند ذبیح الله مجاهد په یوه خبرپاڼه کې ویلي، ”د روان اګست میاشتې په ۱۷ ــ ۱۸ ــ او ۱۹ نیټو باندې امریکايي الوتکو په مسلسل ډول د مجاهدینو په مرکزونو، موټرو او سنګرونو باندی 8 ځله ډرون حملې وکړې او دوه ځله يې جیټ طیارو بمبار وکړ.“

د نوموړي په خبره، د ننګرهار ولایت خوګیاڼو ولسوالی اړوند زاویی سیمه کې طالبانو د داعش پر ضد د عملیاتو تابیا کړې او ډیرې پراخه سیمې يې د هغوی له شتون څخه تصفیه کړي دي، خو په وینا یې، ”لکه د تیر په څیر یوځل بیا امریکايي اشغالګرو د داعش په ملاتړ سیمې ته الوتکې را واستولې او د مجاهدینو په سنګرونو باندې يې مکررې بمبارۍ وکړې.“

مجاهد وایي، د امریکایي ځواکونو له خوا د داعش په ملاتړ په وروستیو هوايي بریدونو کې ”۱۳ تنه طالبان او ۱ تن عام وګړی شهیدان شول او ۶ تنه نور ټپیان شول. “

طالبانو دغه راز ویلي چې څه موده وړاندې یې د داعشیانو یو ګروپ محاصره کړی و، ”تر امریکايي بمبار څخه وروسته د کابل ادارې د عسکرو لخوا په رینجر موټرو کې له محاصرې څخه وژغورل شول چې یو تن په کې ټپي هم وو.“

طالب ویاند په کونړ کې هم یوې پیښې ته اشاره کړې چې په خبره یې، ”د اګست په ۱۸مه نیټه د کونړ ولایت منورې ولسوالۍ لاهور ډاګ سیمه کې هم په هغو مجاهدینو امریکايي ډرون برید وشو چې غوښتل يې د داعشیانو په وړاندې عملیات وکړي، په دغه پيښه کې ۳ مجاهدین شهیدان او ۴ ټپيان شوي وو“.

د یادونې وړ ده چې طالبانو له شمال څخه د داعشیانو جرړه داسې مهال له بیخه وکښله چې له پاسه پرې امریکایي الوتکو پرلپسې بمبارونه کول، چې تر محاصرې وروسته  حکومت د دې ډلې ټول مهم او لوړپوړي غړي په چورلکو کې له سیمې انتقال کړل.

د سیمې خلک وایي،  امریکایان هڅه کوي په کونړ او ننګرهار کې د داعش وروستي مراکز په ټول توان سره وساتي او د هغوی هر اړخیز حمایت وکړي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close