کرزي د امنیتي تړون لاسلیکولو زیانونه تر ګټو زیات بللي

پخواني ولسمشر حامد کرزي له یوې چینایۍ رسنۍ سره په مرکه کې امریکا د افغانستان په ټاکنو کې په لاس وهنه تورن کړې او ویلي یې دي چې په هېواد کې د بهرنیو ځواکونو شتون او د امنیتي تړون لاسلیکولو وضعیت د ښه کېدو پر ځای خراب کړی دی.

حامد کرزي، چې د CGTN ټلوېزون د ”د پواینټ“ پروګرام له چلوونکې سره یې مرکه کوله، امریکا په تېرو ټاکنو کې په مداخله کولو تورنه کړې او زیاته کړې یې ده چې امریکا پرې د خپلو شرایطو تپلو هڅه کړې ده.

نوموړي ویلي، ”دوی زموږ په ټاکنو کې لاسوهنه وکړه، هڅه یې کړې چې خپل شرایط پر موږ راوتپي، دوی هغه څه کړي چې موږ ترې خوښ نه یو.“

کرزي ویلي چې د خپلې واکمنۍ په وروستیو کې یې له امریکا سره شخړې ”د ولسي وګړو د تلفاتو، د افغانانو کورونو ته په زور ننوتلو او د داسې ناڅرګندو پالیسیو پر سر وه چې افغانستان یې نور هم، پر ځای د دې چې د جګړې ختمولو هڅه یې وشي، د خرابۍ پر لور ورټېل واهه.“

په ۲۰۱۴ز کال کې، د ملي وحدت حکومت مشرانو د واک تر سنبالولو یوه ورځ وروسته، له امریکا سره دوه اړخیز امنیتي تړون لاسلیک کړ چې له مخې یې بهرنیو ځواکونو ته تر ۲۰۲۴ز کال پورې په افغانستان کې د پاتې کېدو زمینه برابره شوه. که د ملي وحدت حکومت هم امنیتي تړون نه و لاسلیک کړی، بهرنیو ځواکونو به په افغانستان کې د خپل شتون لپاره اړین قانوني جواز نه درلود او امکان و چې بهرني ځواکونه له ۲۰۱۴ز کال وروسته افغانستان پرېږدي.

حامد کرزی د دې دوه اړخیز امنیتي تړون د لاسلیک سرسخت مخالف و او د امریکا له فشار سره سره یې لاسلیک ته چمتو نه شو.

کرزی وايي، ”زه د امنیتي تړون خلاف وم، ځکه ما فکر نه کاوه چې د دې تړون په لاسلیکولو سره به په افغانستان کې سوله او ثبات راشي. د افغانستان لپاره د امریکا په پالیسۍ کې داسې څه نه تر سترګو کېدل چې ما ته یې د دې تړون د لاسلیکولو اجازه راکړې وای.“

حامد کرزي زیاته کړې چې له امریکا سره د شراکت مخالف نه و، ”خو له امریکا سره شراکت باید د افغانستان ګټې هم تضمین کړي.“

کرزی وايي چې د امنیتي تړون تر لاسلیکولو او د بهرنیو ځواکونو شتون ته د قانوني جواز تر ورکولو وروسته د افغانستان وضعیت نور هم خراب شوی او د بهرنیو ځواکونو شتون کومه ګټه نه لري. ”له بده مرغه، د نوي حکومت تر لاسلیک وروسته، موږ ولیدل چې د افغانستان وضعیت نور هم خراب شوی. په افغانستان کې زیاته ناامني شوه، زیات افغانان ووژل شول او زیانمن شول، هېواد نور هم بې ثباتۍ ته ورټېل وهل شو.“

کرزي د مرکې په پای کې ویلي چې افغانستان د بهرنیو ځواکونو په شتون او د امنیتي تړون په لاسلیکولو سره ”بالکل هیڅ نه دي ترلاسه کړي. له همدې امله، موږ له امریکا غوښتنه کوو چې د افغانستان لپاره پر خپلې پالیسۍ باندې بیا کتنه وکړي او دا یقیني کړي چې په افغانستان کې د امریکا شتون افغانستان ته هم ګټې لري او افغانستان ته سوله راولي.“

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close