مسلمان ځوانه! د ژوند اصلي مسير درک کړه!

ليکوال: خاکسار

مسلمانه ځوانه! د وخت له عصري ټکنالوژۍ څخه د ژوند د اسبابو په څېر استفاده وکړه، نه دا چې د خپل ژوند ټول اصلي اړخونه ورته تغير کړه! عصري ټکنالوژي د دې لپاره وکاروه! چې ژوند ته تر سهولتونه او اسانتياوې برابرې کړې، نه دا چې خپل اسلامي ارزښتونه ورته پرېږدې.

مسلمانه ځوانه! ته عصري ټکنالوژۍ ته دومره معتقد يې چې هر څه دې ورته بدل کړل، په داسې حال کې چې نوره نړۍ دغې ټکنالوژۍ ته يوازې د اسبابو په نظر ګوري. لږ د خپلو اسلافو تاریخ وګوره! چې هغوی د ژوند د ښه کولو او اخرت د خپلو لپاره څه کول؟ خپل اسلاف وپېژنه! چې څوک دي؟ او په نړۍ کې يې څنګه وخت تېر کړی دی؟ په نړيوالو کفري نظامونو يې څنګه راج او باج چلولو! څنګه يې پر ټولې نړۍ خپل ځان منلی وو؟

مسلمانه ځوانه!

د سلمان خان او شاهرخ خان بيوګرافي او کلچر پرېږده! لږ د خپلو تېرو اتلانو تاريخ وګوره! چې په نړۍ يې څنګه رعب او دبدبه پرته وه، ولې يې نړۍ له نومونو وېرېدله؟ د خپلو اسلافو له تاريخه زده کړه! چې ولې يې نومونه زرينو پاڼو سبت کړي دي؟ ولې يې د اتلوليو ساری په نړۍ کې نشته؟ ځان پرې پوه کړه! هغوی خپل ژوند څنګه تېرولو؟

خپل ژوند د هغوی په ژوند کې ارزيابي کړه!  چې هغوی ولې په ټوله نړۍ اسلامي نظام چلولو؟ او ته ولې د جمهوري نظام دومره تابع ګرځېدلی يې، چې خپل کلچر، دود او دستور او اسلامي عنعنات دې ورته پرېښودل او د کفري ټولنې بد عادات دې خپل کړل.

که په خپل ګرېوان کې سوچ او فکر وکړې دا پخپله د ژوند د مسير تغير دی چې تا پخپل لاس ورکړی دی، ستا ژوند د اسلافو له ژونده په مکمله معنا بدل دی.

اسلافو مو خپلې وينې تويولې خو د نورو مسلمانانو ژوند به يې روښانولو، خو ته د خپلې ټولنې د اوږو بار شوې، خپل مسير دې د غرب په تقليد روان کړی دی، غرب درته  په ګوړه کې زهر ډالۍ کوي خو ته بيا هم پر ځای د دې چې په وړاندې يې مبارزه وکړې؛ ملاتړ يې هم کوې او په ډېر فخر او وياړ يې خپلوې.

مسلمانه ځوانه! په دې پوه شه! چې کاميابي او بريا د پرديو په تقليد کې نه ده، بلکې د خپل حق دين په پيروۍ کې ده، د کاميابۍ راز دا نه دی چې د هاليووډ او باليووډ د ستورو بايوګرافي په خپله حافظه کې ټايپ کړې، بلکې کاميابي په دې کې ده چې د خپلو ريښتينو اتلانو ژوندليک او تاريخي کارنامې په غور او دقت وګورې او تقليد يې وکړې.

مسلمانه ځوانه!

ياد دې نه دي چې يوې مسلمانې خور (ناهيد) په خپلو وينو پر يوه دسمال د سند له زندانونو څخه خپل مسلمان قوم ته ولېږه او قوم ورته خپل اوولس کلن زوی (محمد بن قاسم) راولېږه او خپله سپېڅلې خور يې د سند د ډاکوګانو له زندانونو څخه خلاصه کړه، بلکې د سند په ساره او اوږده کې يې حق دين خپور کړ.

مسلمانه ځوانه! څه فکر کوې؟ د محمد بن قاسم مسير درته غلط ښکاري؟ معاذ الله،

نه بلکې ته د غرب ړوند تقليد کوې، ته د غرب له ډيموکراسۍ نه متأثر ښکارې، ځکه خو دې د خپل ژوند مسير تغير کړی دی، تا خپل ټول ژوند د غرب په ډيموکراسۍ برابر کړی دی، تا د خپلو اسلافو تاريخ او کارنامې هېرې کړي دي، ته د خپل ژوند قېمتي وخت د فلمي ستورو او غربي تمدن د مخکښانو په بايوګرافۍ زده کولو کې لټوې! تا د خپل ژوند ارزښت او قدر هېر کړی دی.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close