مطبوعاتو ته لنډه کتنه

تېره ورځ کابل د دوو شخصيتونو د ياد غونډو شاهد و، د پخواني جمهور رئيس د معاون مارشال فهيم د ۴م تلين ياد غونډه د لويې جرګې په تالار کې او د حزب وحدت اسلامي د وژل شوي مشر عبدالعلي مزاري د ۲۳مې کاليزې په مناسبت په دشت برچي کې خلک راټول شوي وو.

په هيواد کې چاپېدونکو ورځپاڼو د نن ورځې سرمقالې تر ډېره د حزب وحدت اسلامي د پخواني مشر عبدالعلي مزاري د ۲۳مې کاليزې په مراسمو بريد ته ځانګړې کړې دي او هرې ورځپاڼې له خپله ليده دغه بريد ناروا عمل بلل او غندلی يې دی.

ويسا:

ويسا ورځپاڼې په خپله سرمقاله کې تر دې عنوان لاندې چې (پر ناروغۍ اعتراف خو پر اصلي لامل نه!) لکلي چې دا يو تريخ واقعيت دی چې نن مو ولس له کومو ستونزو سره مخامخ دی، يوه د بلې هغې طبعي پالې دي.

د مقالې ليکوال ليکي چې په پرونيو غونډو کې هيڅ مشر د هيواد د بدې وضعې لامل ته چې هغه د بهرنيانو پوځي او سياسي حضور دی، هيڅ اشاره ونه کړه، په داسې حال کې چې د ورته پيښو په وړاندې نننی کمزوری او ناتوانه حکومت د همدې بهرنيانو طرحه وه، بهرنيانو دغسې حکومت رامنځته کړی چې هم ولس ته خدمت ونکړای شي، هم جګړه روانه پاتې شي او هم مو هيواد د قومي او سمتي شخړو ډګر وګرځي.

سرمقالې جهادي مشران مخاطب کړي چې که حکومتي يارانو د بهرنيانو وحشتونو ته اشاره ونه کړه يو عذر به لري، خو هغو ولې څه ونه ويل چې د ولس د ټولو قربانيو او جهادي دعوه داران هم دوی دي، د دوی خولې د پرديو په وحشت څه شي پټې کړې دي؟!

ليکوال وايي په هيواد کې د روانو ټولو بدمرغيو اصلي لامل بهرنيان دي، اوس چې سياسي نخبه ګان پر ناروغۍ اعتراف کوي، پر لاملونو يې هم بايد اقرار وکړي چې د درملنې سمه لاره يې غوره کړای شي.

۸ صبح:

هشت صبح ورځپاڼه بيا خپله سرمقاله په دې عنوان پيل کړې چې (پوليس ولې په خپله ناتواني اعتراف نه کوي؟)

د مقالې ليکوال وايي چې امنيتي ارګانونه د دې لپاره هست شوي چې د ملت ژوند چې له ارزښتونو يو لوی ارزښت دی، وساتي. که پوليس د خلکو د ژوند ساتنې وس نه لري نو دا حق هم نه لري چې په خپل ناتواني اعتراف ونه کړي، له دغه ځايه چې د انساني ژوند ساتنه ذاتي ارزښت لري، لازمه ده چې امنيتي ارګانونه، چې وجودي فلسفه يې د همدې ارزښت تحقق دی، هر وخت موضوع روښانه کړي.

مقاله وړاندې ليکي چې دلوت د ازادي جشن،  ۸م د ثور او دې ته ورته نورې غونډې په يوه محدوده کې جوړوي، دا کار د دې ښکارندويي کوي چې امنيتي ارګانونه د غونډو امنيت نشي نيولای. چې داسې ده، نو ولې په رسمي توګه خپله بې وسي نه اعلانوي؟ ملت هم پوهيږي چې د امنيتي ځواک توانايي په کومه اندازه ده، بهتره ده چې پوليس دا اعلان وکړي، تر څو خلک خپله د غونډو امنيتي ونيسي او يا يې لغوه کړي.

ماندګار:

ماندګار ورځپاڼې خپله سرمقاله د ارګ او اشرف غني انحصارګرايانه سياستونو ته ځانګړې کړې ده او سياسي حرکتونه يې د مشترکاتو په يو محور راغونډېدو ته بللي، تر څو يو ملي وفاع اعلان او د ارګ د منفي کارونو په وړاندې لاس په کار شي.

سرمقاله په مجموع کې ليکي چې تبعيضي او غيرمنصفانه سياستونه او د دولت د مديريت له ادرسه نفاق اچونکې حرکات د دې سبب شوي چې هيواد يوې خطرناکې مرحلې ته سوق کړي.

مقاله وړاندې ليکي چې که خلک د ارګ د فعاليتونو په مقابل کې ودريږي نو دا ملت ته د دې ډاډ ورکوي چې بيا به هيڅ حاکم او دولت د خلکو له غوښتنو بې توجهي ونکړي او نه به هيواد په قومي لوبو د بې ثباتي او تجزيې لور ته بوځي.

د مقاله ليکوال په اند کوم خطرات چې د ارګ د سياسيتونو او انحصاري حلقو له لورې افغانستان تهديدوي، دا په مرابتو له امنيتي او نظامي خطراتو ورانونکي دي. د ارګ لخوا تبعيض آميز سياستونه او قومي اختلافاتو ته وده ورکول د وروستيو درې کلونو د ټولو بې نظميو باعث ګرځيدلي، چې بايد د دې سياستونو مخه ونيول شي او ارګ د توطيه جوړونکو ځان غوښتونکو له محاصرې خلاص شي.

مقاله ليکي چې دا د نخبه ګانو، سياسيون، متنفذينو او ټولو سياسي حرکتونو رسالت دی چې د موجده وضعيت په وړاندې د (ملي وفاق) تر نامه لاندې راټول شي او له هغو  انديښمنونکو توافقاتو چې په اينده کې به د افغانستان ګريوان نيسي، ځان مخکې کړي.

تميم توفيق

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close