کابل ټکی کام (پنجشنبه، ۲ چنګاښ، ۱۴۰۱ل)
م.م. ویلي، اټکل کوي چې د افغانستان په پکتیکا او خوست ولایتونو کې به د وړمې شپې زورورې زلزلې تر ۲۰۰۰ زره ډېر کورونه ویجاړ کړي وي.
د ملګرو ملتونو د بشري مرستو همغږي کوونکي “رمیز الاکبروف” یوې خبري ناستې ته د خبرو پر مهال ویلي، چې په زلزله کې د مړو شویو کسانو شمېرې ښایي تر هغو څو چنده ډېرې وي چې اوس اعلانیږي.
نوموړی د خپلو خبرو پر دوام وایي چې د دوی د اټکل له مخې په پکتیکا او خوست ولایتونو کې تر ۲۰۰۰ زرو ډېر کورونه نړیدلي او په خبره یې که د هر کور د غړو شمیر په اوسط ډول اته تنه وي نو د مرګ ژوبلې شمېرې به یې د “اسلامي امارت” لخوا د خپرو شویو ارقامو په پرتله څو برابره ډيرې وي.
د الاکبروف په خبره دوی تر خاورو لاندې د ایسار و کسانو د را ایستلو لپاره اړین وسایل په واک کې نه لري او په وینا یې د اسلامي امارت حکومت هم په دې برخه کې د امکاناتو له محدودیتونو سره مخ دی.
باید وویل شي چې د وړمې شپې د زورورې زلزلې له کبله تر دې دمه د ۱۰۰۰ تنو مړینه او د ۱۵۰۰ نورو د ټپي کېدل تایید شوي؛ خو ګڼ کسان لا هم تر خاورو لاندې ایسار پاتې دي چې ښایي د مرګ ژوبلې کچه لوړه شي.
