ننګرهار: جلال اباد ښار کې درې پرلپسې چاودنو مرګ ژوبله اړولې

(کابل ټکی کام، ۱۳۹۷، وږی ۲۰)

د ننګرهار ولايت جلال اباد ښار د لیسو مخې ته درې چاودنې شوي چې له کبله يې پنځو کسانو ته مرګ ژوبله اوښتې ده.

د ننګرهار د والي وياند عطاءالله خوږياڼی وايي، دغه چاودنې د نجونو د دوو ښونځيو او د هلکانو د يوه ښوونځي مخې ته شوي دي.

د ننګرهار د پوهنې رياست وياند اصف شینواری وايي، لومړۍ چاودنه نن سهار د بي بي حوا ليسې ته څېرمه شواته بجې د ځای پرځای شويو چاودېدونکو توکو له امله وشوه چې د یادې ليسې يو ملازم پکې ټپي شو.

د شينواري په وينا، نورې دوه چاودنې د بهسودو ولسوالۍ بلندغر سيمه کې یو په بل پسې شوي چې درې تنه يې ټپيان کړي دي.

خو عطاءالله خوږياڼی وايي، د ملکه حميرا انجونواو د محمدي صاحبزاده هلکانو ښوونځي ته څېرمه شوي چې يو څوارلس کلن ماشوم پکې وژل شوي او څلور عام خلک پکې ټپيان شوي دي.

ويل کېږي، په ټپيانو کې د ښوونځي دوه زده کوونکي هم شامل دي.

تر اوسه د دغه چاودنو مسئوليت چا نه دی منلی، خو تر دې مخکې داعش وسله والې ډلې په ننګرها کې د معارف اړوند ښوونځيو ته د زده کړو د ودرولو ګواښ کړی دی.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close