ننگرهار؛ دویم «حُمص» او درېیم عراق/ خالد روان

خالد روان

زموږ بدمرغي داده، چې نیوکه نه‌شو زغملی او سمدلاسه ټاپې لگوو. څو کاله مخکې مې ویلي وو، چې امریکا غواړي ننگرهار د عراق او سوریې په برخلیک اخته کړي. هغه وخت هم ځینو احساساتیانو راته کنځلې وکړې. ځینو خو راته وویل، چې طالبانو نو څه کړي؟ خو که همدغه طالبان نه وای، نو اوس به ټول شینواري د داعشیانو له لاسه وتلي وای.

امریکا، ناټو او افغان حکومت د طالبانو د ملاتولو لپاره ټول زور وازمایه؛ خو هغسې بریا یې خپله نه کړه، چې نړۍ ته یې د نمونې په ډول وړاندې کړي. اربکیان، پاڅونوال، داعش او بېلابېلې لارې یې وکارولې. خو بیا هم د طالبانو په بریدونو، د ولسوالیو په سقوط او د جنگیالیو په شمېر کې یې د پاموړ کموالی رانغی، بلکې دا تېره ورځ یې په غزني او پکتیکا کې درې ولسوالۍ پرله‌پسې سقوط کړې.

په افغانستان کې د امریکايي ځواکونو قومندان جنرال نیکولسن داعش ته ښه ډېر کمپاین وکړ او د تېرې ورځې خبرې یې د دې ښکاره ښکاروندوي کوي، چې دوی ولې داعش دومره خطرناک معرفي کوي او د بیا ـ بیا ځپلو اعلانونه یې کوي. خو نه داعش ځپل کېږي، بلکې د طالبانو او داعش په جگړه کې امریکایان د داعش پر ځای د طالبانو لیکې بمباروي.

داعشیانو څو اوونۍ وړاندې په ننگرهار ټولې ښوونیزې ادارې خپل هدف وگرځولې، چې ورسره ځینې ښوونځي، پوهنتونونه او انستیتونه او د  زده‌کړو مرکزونه د زده کوونکو او محصلانو پرمخ وتړل شول. د ننگرهار د پوهنې ریاست، د جلال اباد ښاري مدیریت، په خوږیاڼیو کې د دوو لېسو سوځول او د ملازمینو وژل او نور یې ښکاره د وحشت بېلگې دي.

په جلال اباد کې هره ورځ په داسې ځایونو کې چاودنه کېږي، چې هلته بغیر له ملکیانو نور هېڅوک نه وي او پړه یې داعش په ډېره بې شرمۍ اخلي. پلازې، ښوونځي، سکهان، روغتونونه او نورې ملکي ادارې د داعش د بریدونو هدف دی. داعشیانو بغیر له امریکایانو او داعشیانو نور ټول افغانان کافران ښکاري او د مرگ جواز خو یې وختي ورته په جېبونو کې اچولی وي.

کله چې داعشي حشرات د عراق موصل، کرکوک، د سوریې حُمص او نورو ښارونو ته ننوتل، نو روسیې، ایران، ترکیې، فرانسې او د سوریې نورو متحدینو هوايي بمباریو ته زور ورته وکړ، چې یوه ودانه سوریه یې په ابدي کنډواله بدله کړه. تاسې د سوریې د ۲۰۱۱ز کال او د ۲۰۱۸ز کلونو ترمنځ تاریخ وگورئ، چې په سوریايي مسلمانانو څه تېر شول او دمشق او د سوریې نور ښارونه څومره وران شول، چې بېرته ودانول یې کلونه ـ کلونه وخت غواړي، خو هغه به سوریایان ژوندي پاتې نه وي او ودانۍ به بغیر له انسانانو جوړې شوي وي.

امریکا دغه لوبه دلته هم روانه کړې. له واړه داعشه یې غټه بلا جوړه کړې او د ننگرهار ځايي خلکو ته دغه خبرې ورپیچکاري کوي، چې تاسې باید د داعش له نوم او وحشت سره اشنا شئ، ځکه د دوی بریدونه به نور هم ډېر شي او تاسې باید هرې قربانۍ ته تیار اووسئ.

له طالبانو هیله کوم، چې نور پر داعشیانو هېڅ ډول ترحم ونه کړي. په ننگرهار، کونړ، لغمان او نورستان کې د داعشیانو بېخ ور اوباسي او تش ملاتړ کوونکو ته یې هم سختې سزاوې ورکړي. دغه هیله له حکومت او امریکا ځکه نه شي کېدای، چې دوی په خپله د دوی تر شا ولاړ دي او دغه خوږه دوستي هېڅکله نه خرابوي.

د داعش هوايي خلافت تراوسه یو کیلومتر ځمکه په واک کې نه لري، خو خلافت یې له عراق سیده افغانستان ته راغی او په منځ کې یې ایران پرېښود، خو دلته د طالبانو په موجودیت کې به یې ټغر ډېر ژر ورټول شي او د امریکا او ناټو به د خپلو زرگونو ارمانونو سره ـ سره  ننگرهار هم خوندي پاتې شي. ان شاء الله

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close