نيويارک ټايمز: داخلي بريدونو امريکايي پوځيان اندېښمن کړي

(کابل ټکی کام، ۱۳۹۷، چنګاښ ۳۰)

د امريکا چاپ نيويارک ټايمز ورځپاڼې په يوه راپور کې ليکلي، چې په افغانستان کې ميشت امريکايي پوځيان د داخلي بريدونه له کبله سخت اندېښمن دي.

نيويارک ټايمز ليکي، د غوڅ ملاتړ ماموريت په چوکاټ کې افغان ځواکونو ته د بهرنيو ځواکونو له لوري پوځي روزنه ورکول کېږي خو ډير کله په دغه روزنه کې امريکايي پوځيان او روزونکي ژوند له لاسه ورکوي.

ورځپاڼې د هغه برید يادونه کړې څو ورځې مخکې د روزګان په هوايي ډګر کې د يوه افغان عسکر له لوري پر بهرنيو ځواکونو بريد وشو چې د امريکايانو په وينا په بريد کې يو عسکر ووژل شو او دوه نور ټپيان شول.

طالبانو ويلي و بريد د دوی د يوه نفوذي کس له خوا شوی چې پکې څلور امريکايي پوځيان ووژل شول او ګڼ نور ټپيان شول.

امريکايي چارواکو د خپلو پوځيانو پر وړاندې دغه ډول بريدونه تر ټولو خطرناک بللي او نيويارک ټايمز ته يې ويلي، په داسې طرحو يې کار پيل کړی چې د امريکايي روزونکو او پوځيانو ژوند ته پکې خطر نه وي.

له کله راهيسې چې بهرني پوځيان افغانستان ته راغلي د عسکرو له خوا پرې بيشمېره وسله والو بريدونه شوي چې د امريکايي ځواکونو په ګډون پکې د ناټو غړو د نورو هېوادونو لسګونه عسکر وژل شوي او ګڼ نور ټپيان شوي دي.

پر افغان او بهرنيو ځواکونو د ډيري بريدونو مسئوليت طالبانو منلی او هغه يې خپل نفوذي کسان بللي دي.

امريکايي چارواکي په داسې حال کې د داخلي بريدونو اندېښنه څرګندوني چې نن په کندهار او زابل کې پر افغان عسکرو داخلي بريدونه شوي او ګڼو عسکرو ته يې مرګ ژوبله اړولې ده.

د کندهار د امنيې قومندانۍ وياند وايي، په ارغنداب کې يوه عسکر خپل څلور ملګري په ډزو وژلي خو د امنیتي ادارو له لوري نيول شوی، بل پلو د طالبانو وياند قاري يوسف احمدي وايي د زابل په ارغنداب کې دوه عسکرو چې په وينا يې د دوی نفوذي کسان و خپل څلور ملګري وژلي او ځانونه يې طالبانو ته رسولي دي.

په وروستيو کې د افغان ځواکونو په ليکو کې داخلي بريدونه او پر بهرنيو عسکرو د افغان ځواکونو بريدونو افغان او بهرني لوړپوړي چارواکي اندېښمن کړي زياتوي چې دغه ډول بريدونه د افغان پوځيانو يو څه پاتې خپلمنځي باور هم له منځه وړي.

طالبانو په خپلو خبرپاڼو او اعلاميو کې ويلي و چې د افغان پوځ په ليکو کې ډيری نفوذي کسان لري چې له موقع څخه په استفادې به په بهرنيو او دولتي ځواکونو بريدونه کوي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close