نیویارک ټایمز: غزني کې یواځې دوې ولسوالۍ د حکومت لاس کې دي

نیویارک ټایمز امریکايۍ ورځپاڼې په خپل یوه راپور کې ویلي چې د غزني د ۱۸ ولسوالیو له جملې ۱۶ طالبانو نیولې دي او یواځې دوې ولسوالۍ د حکومت په لاس کې دي.

نیویارک ټایمز نن د زمري په ۲۲مه په خپل راپور کې لیکلي چې طالبانو پر غزني ښار له ستر برید سره هممهاله، چې نن څلورمه ورځ هم دوام لري او په پایله کې یې طالبانو د ښار زیاتره برخې نیولې دي، د دې ولایت پر څلورو ولسوالیو بریدونه پیل کړل، چې څلور واړه یې له حکومتي ځواکونو ونیولې.

نیوریاک ټایمز وايي، نن، دوشنبه (۲۲ زمری)، حکومت د غزني د ۱۸ ولسوالیو له جملې پر دوو ولسوالیو بشپړ کنټرول درلود. که طالبان دا پاتې دوې ولسوالۍ هم ونیسي، نو دا به د افغانستان په ۱۷ کلنه جګړه کې لومړی ځل وي چې طالبان یوه پوره ولایت ته سقوط ورکوي.

دا امریکايۍ ورځپاڼه وايي، د جمعې پر ورځ طالبانو په اجرستان ولسوالۍ کې د کمانډو ځواکونو پر یوه مرکز مرګونی برید وکړ چې، د افغان لوړپوړو چارواکو په خبره، نږدې ۱۰۰ کمانډو عسکر او د پولیسو افسران پکې ووژل شول.

دې ولسوالۍ وروسته سقوط وکړ.

په دې بله ورځ، شنبه / د زمري ۲۰مه، طالبانو د غزني خواجه عمري ولسوالي ونیوله او کور په کور د دولتي عسکرو په نیولو پسې ګرځېدل.

د نیویارک ټایمز په خبره، د یک شنبې په ورځ، د زمري ۲۱مه، یې، د ولایتي شورا د یوه غړي حمیدالله نوروز په خبره، د غزني ولایت په شمال غرب کې د ناور په نوم ستره ولسوالي ونیوله.

د دوشنبې په ورځ، د زمري ۲۲مه، یې د غزني ده یک ولسوالي ونیوله.

پر غزني ښار او د طالبانو برید:

طالبانو د تیرې جمعې په ورځ، د زمري ۱۹مه، سهار وختي پر غزني ښار له څلورو لورو همغږي بریدونه پیل کړل. د دې عملیاتو لپاره طالبانو له ځینو نورو ولایتونو خپلې قطعې راټولې کړې او اوس د ښار دننه او شاوخوا له حکومتي ځواکونو سره په سخته جګړه بوخت دي.

د غزني ښار په عملیاتو کې امریکايي ځواکونه د هوا او، د غزني ښار د امنیه قومندان په خبره، د ځمکې له لارې له افغان ځواکونو سره مرسته کوي.

تر دې دمه په دې عملیاتو کې د دوو چورلکو د سقوط خبر ورکړل شوی، خو چارواکي د یوې نسکورېدل مني او د بلې د سقوط په اړه یې څه نه دي ویلي.

طالبانو همداراز غزني ښار ته د کومکي ځواکونو د مخنیوي لپاره د کابل-کندهار لاره په میدان وردګ ولایت کې تړلې ده. د میدان وردګو په سیداباد ولسوالۍ کې غزني ښار ته تلونکې قواوې د طالبانو تر سختو او دوامدارو برید لاندې راغلې دي.

همداراز، د زابل او پکتیا له لارې د دولتي ځواکونو مرستې ته تلونکې قواوې هم په دې ولایتونو کې له طالبانو سره په جګړه بوختې دي.

جګړه کې اوښتي تلفات:

د غزني ښار د روغتون مسؤل، باز محمد همت، تېره ورځ، یک شنبه، نیویارک ټایمز ته د ټلفون له لارې ویلي و چې روغتون ته ۱۱۳ مړي او ۱۴۲ ټپیان وروړل شوي، چې زیاتره یې دولتي ځواکونه دي.

دا چې نن ورځ هم جګړه روانه وه نو ښايي تلفات نور هم پسې لوړ شوي وي.

بل خوا، د کورنیو چارو وزیر، ویس احمد برمک، نن دوشنبه په یوه خبري کنفرانس کې وویل چې په دې جګړه کې ۷۰ پولیس افسران وژل شوي دي.

دولتي چارواکي ادعا کوي چې په جګړه کې یې تر ۱۹۴ زیات طالبان وژلي او ۱۴۷ نور یې ټپیان کړي دي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close