نیکولسن، سعودي ناسته، پرلتونه او مذهبي فشار/ بدرالدین ابدال

امریکا او افغان حکومت د تل په څېر له سولې سیاسي گټه اخلي. دوی عامو خلکو ته داسې ذهنیت ورکوي، چې امریکا+ افغان حکومت سوله غواړي، خو طالبان د سولې مخالفت کوي او طالبان د دوی هره غونډه له وخته مخکې سبوتاژ کړي. داسې هم شوي چې د طالبانو په نامه جعلي استازي هم ځینو ناستو ته بلل شوي او د روان کال د ترکیې ناسته یې یوه ښه بېلگه وه، چې گډونوال یې د «مه ښوره» کلمه تراوسه مشهوره ده.

 دوی هره ورځ د طالبانو او افغان حکومت ترمنځ د سولې د خبرو د پیل کېدو اوازې خپروي؛ خو څو ساعته وروسته یې طالبان رد کړي. تېره اوونۍ د سولې د عالي شورا د دارالانشاء مشر ډاکټر اکرم خپلواک وویل، چې راتلونکې اوونۍ له طالبانو سره مخامخ خبرې پیلوي. طالبانو له دې وړاندې هم لسگونه ځلې ویلي، چې دوی له افغان حکومت سره د سولې خبرې نه کوي؛ ځکه د افغان حکومت د واک واگې له امریکا سره دي او د روانې جگړې اصلي لامل هم امریکا ده او باید له امریکا سره د روانې جگړې خبره یوه طرفه شي.

تېره ورځ د سعودي عربستان رسنیو وویل، چې د سعودي حکومت په پام کې لري د جدې په ښار کې د ۳۷ اسلامي هېوادونو دیني عالمان د افغانستان روانه جگړه د مذهبي اړخه وڅېړي او خپله فتوا به بیا صادره کړي. داسې فتوا لکه د کابل په ناسته کې چې صادره شوه او دولت ته یې هېڅ گټه ونه کړه. ځکه د کابل د ناستې مفتیانو یوازې له طالبانو سوله غوښتې وه، خو د امریکایانو یاده یې نه وه کړې.

له دې وړاندې په اندونیزیا او کابل کې هم ورته غونډې شوي وې؛ خو یوه ذره گټه یې ونه کړه، ځکه په افغانستان کې د یوه امریکايي پوځي په شتون کې هم د طالبانو روانه جګړه څوک نه‌شي ننگولی. په داسې وخت کې به د طالبانو روانه جگړه څوک څنگه وننگوي، چې زرگونه امریکايي، اروپايي، اسټرالیاوي او د کفرۍ نړۍ زرگونه عسکر لاهم په افغانستان کې دي او هره ورځ دلته بې گناه افغانان شهیدانوي. زموږ د هېواد ځمکني او هوايي واگې د دوی په لاس کې وي او د دوی پر ضد مبارزه کوونکي د زندان د تمبو شاته پراته وي.

نیکولسن، پرلتونه او مذهبي فشار

په افغانستان کې د امریکايي ځواکونو قومندان جنرال نیکولسن ویلي وو: پر طالبانو به مذهبي او سوله‌ییز فشارونه ډېر کړي. له دې خبرې وروسته د هېواد په گوټ ـ گوټ کې پرلتونه پیل شول او د هلمند د سولې کاروان ۷۰۰ کیلومټره مزل پایله هم تراوسه بې برخلیکه پاتې ده. ځکه د هلمند د سولې کاروان غړي هم له طالبانو سوله غواړي او د امریکا سفارت ته د دوو ورځو پرلت وروسته یې هم کومه گټه ونه کړه. نه یې له امریکايي چارواکو سره خبرې وشوې او امریکا سفارت ته یې سپارلي لیک کې له امریکایانو مننه کړې وه؛ خو د امریکایانو د ژر وتلو هېڅ یاده یې نه وه کړې.

د سعودي ناسته به هم وشي؛ خو گټه به یې بیا هم صفر وي. ځکه دغه ډول ناستې یوازې د وخت ضایع کولو لاره ده، چې له دې لارې د جگړې پر مخ بیوونکي لا پړسېږي او د سولې د عالي شورا معاشونه، سفرونه او ډالري فتوا گانې روانې ساتل کېږي.

طالبان د سولې معلوم ادرس لري او امریکا+ افغان حکومت دې دغه ادرس نه ورک کوي. د سولې ټولې خبرې دې د قطر له دفتر سره مخامخ وکړي او د سولې خیرات دې له گاونډیو او د سعودي له دولتي مفتیانو نه اخلي.د سعودي فتواوو هغه وخت ارزښت له لاسه ورکړی، چې کله محمد بن سلمان «د نوي اسلام» د مروجولو کمپاین پیل کړی او عام خلک په دې فتواوو نه غولېږي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close