هرات: سېلابونو راوتلو خلکو ته مالي او ځاني زيانونه اړولي

(کابل ټکی کام، ۱۳۹۷، سلواغه ۲۴)

چارواکو په هرات ولايت کې د باران، واورې او سختو سېلابونو راوتو له کبله بيړنی حالت اعلان کړی دی.

هرات کې له تيرې ورځې سخت باران او واورې ورښت پيل شوی چې د سېلابونو راوتو له کبله خلکو ته ګڼ مالي او ځاني زيانونه اوښتي دي.

ځايي سرچينې وايي، د هرات اسلام قلعه، د هرات تورغنډۍ او دغه ولايت ته ورتلونکې ډيرې لارې د خلکو د تګ راتګ پر مخ تړل شوي دي.

د هرات امنیه قومندان جنرال امين الله امرخېل وايي، د باران ورښت او سېلابونو له کبله لسګونه موټر او پکې سپاره مسافر بند پاتې و چې تر دې دمه ځينې کسان ژغورل شوي خو په وينا يې لا هم ډيری مسافر بند دي او د کاماز موټرو ته اړتيا ده.

سرچينې وايي، د سېلابونو راوتلو له کبله د هرات ښار پايان آب، پخوانۍ فرقې او کندهار دروازه سيمه کې ګڼ شمير کورونه او دوکانونه ويجاړ کړي دي.

د دغه ولايت د روغتيا مسؤل حکيم تمنا وايي، له پرون ماذيګر راهيسې تر دې دمه پنځه تنه ټپيان او دوه تنه مړه شوي چې د ټپيانو په ډله کې يوه ميرمنه هم ده.

د هرات سربيره په هلمند، فراه او د هېواد په یو شمير نورو برخو کې هم سخت بارانونه شوي چې د خلکو کورونه او دوکانونه يې نړولي دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close