ولسمشره! کمپایني نه، رښتینې وعدې وکړه / نعمان لطیف

نعمان لطیف

دطالبانو وخت کې چې دهېواد سرکونه خامه ول او داخل کې باربري موټر له روسانو را پاته کوماز او شش پای موټرې وې. په هغو موټرو زیات وخت وتلی ؤ، په سرک به چې روان ول لکه ګوزڼ چې وهلي وي ټول به ګړبېده

ددغو زړو کوماز موټرو کوم موټروان په داسې سرعت کې روان دی چې نېږدې ده باډي ترې وغورځي. یو چا ورغږ کړی دی: استاده باډي دې غورځي.

استاد چورت وهلی لکه چې مسخره راپورې کوي. تر ښېښې یې خوله پسې ورکاږلې ده: باډي یې څه کوې کش ته یې وګوره، او زیاتي یې ایکسلېټر ته پښه سمه ور تمبه کړې ده.

ولسمشر غني پرون هلمند ته تللی ؤ. هلمندیانو ته یې یو غر ښوروا او بل غر غوښه کړ. دقیقه کې یې د کجکي بند پراخ کړ، دبرېښنا سترکګۍ یې پرې وتړلې او دبرېښنا لاینونه یې ټول هلمند ته وغځول.

هلمند تک سپینه رڼا شو، دستي یې منډه کړه د یؤه روغتیایی کمپلکس ډبره یې هم ورته کېښوده، چکچک جوړ شو او ناست خلک په خیالونو کې ورک شؤل.

اوس که غږ ورته کوې چې وا ولسمشره باډۍ دې ګړبېږي، لومړی یې نټونه سم ټایټ کړه او بیا موشم واخله، هسې نه درنه پرېوځي؛ جذباتي سړی دی، دستي به درته ووایي: باډۍ څه کوئ کش ته مې وګورئ، که په باډي وطن جوړېدلای، مسعود او رباني، دوستم او مجددي به جوړ کړی وای، تاسو وګورئ چې څنګه ژر د کجکي بند درته پراخؤم، په روغتیایي کمپلکس درته کار شروع کؤم او ….

وطنونه په ډوزو نه جوړیږي، عملي کارونو ته اړتیا لري – اضافي وعدو او کمپایني ډوزو ته نه، داسې مخلصانه وعدو او کړنو ته اړتیا لري چې دستي کارونه پیل شي.

ولسمشر چې ننګرهار ته تللی ؤ، هلته یې هم د یؤه روغتیایي کمپلکس ډبره کېښوده. کابل ته رسیدلی نه ؤ خلک وپوهېدل چې دروغتیایي کمپلکس دا دریم ځل دی چې افتتاح یې کیږي.

د ننګرهاریانو سره یې یو کال کې دننه د ۶ زره ښوونځیو جوړولو وعده وکړه؛ اوس که څوک ننګرهار کې دمعارف حال وویني دننګرهاریانو په مستقبل به اوښکې توی کړي.

معارف په ټپه ولاړ دی، پوستې پکې جوړې دي او دښوونځیو دروازې دزده کونکیو پر مخ تړلي دي، فقط استادان دتړل شویو دروازو تر شاه ناست دي چایونه شوپوي.

پوهنتونو کې مات ګوډ درسونه شته دی خو د شپني پوهنځیو دسمستر فیسونه له دری زره افغانیو اووه زره افغانیو ته پورته شوي دي.

په داسې حال کې چې بستونه نشته دی او که شته دی نو په ډالرو او خپلوان شریکۍ دي، د خلکو اقتصاد صفر دی، بېکاري اوج ته رسېدلې ده او فیسونه او نرخونه مخ پر پورته روان دي؛ ننګرهاریان وایي له هغو شپږو زرو خیالي ښوونځیو تېر یو، دې شته ښوونځیو ته دې راته لاس رسی ممکن کړي او دژوند تېرؤلو حق دې راکړي.

کابل له امریکا پرته له هیچا سره د اړیکو هوډ نلري او یا واک؛ ګاؤنډ کې یې پراته له مخې د ځان بد خواه کړي دي. مخکې پاکستان دښمن ؤ اوس روس او ایران هم ددښمنانو لیست کې اضافه شول، بله ورځ به چینایان هم راته دښمنان کړي.

سړی نه پوهیږي چې ددې سړي خپلې باډۍ ته څنګه پام نشته دی او پر مخ همداسې په فُل ایکلسلېټر ولې روان دی؟!

طالبان ورځ تر بل په سیاست کې مطرح کیږي او له ګاؤنډیانو سره دوستانه اړیکي پیدا کوي او ټینګوي خو کابل په سیمه کې د اسرائیل بڼه غوره کړې ده او ټول دوستان یې له لاسه ورکړي دي، فقط لکه په سؤره کې واده شوې نجلۍ چې ټول کور یې دښمنان وي او یواځې دمېړه (امریکا) دوه سترګو ته شپې سبا کوي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close