ولسمشره! یو مډال ماته هم راکړه/ بدرالدین ابدال

د کرزي د واکمنۍ وروستۍ ورځې وې. د ارگ ملا امام کرزي ته وویل: ماته د جنرالۍ رتبه راکړه. کرزي ورته ترخه مُسکا وکړه او ترې روان شو. د ارگ ملا امام ملامت نه و، چې له کرزي یې د جنرالۍ غوښتنه کوله؛ ځکه افغانستان ته هسې هم د جنرالانو کور ویل کېږي او له امریکا ډېر جنرالان په افغانستان کې دي. په تېرو اوولس کلونو کې دلته ماشومانو ته هم د جنرالۍ رتبې ورکړل شوې او د افغانانو قاتلین تر مارشالۍ پورې هم ورسېدل.

د جنرال عبدالرشید دوه ماشوم زامنو ته هم د جنرالۍ رتبې ورکړل شوې. د شمال ټلوالې واړه او زاړه له مخې جنرالان دي او ځینې ماشومان یې حتا د ملي امنیت شورا په مهم ځای کې لوړ پوړي مشاورین دي. د جنرالۍ رتبه په افغانستان کې ښه پر مخ روانه ده او کېدای شي څو کاله وروسته دلته د چارواکو ټول زامن یا جنرالان او یا هم مارشالان وي.

یو ملگری مې درې کاله مخکې ملي اردو ته تللی. اوس د بلوک قومندان شوی دی. یوه ورځ مې ورسره ټوکې کولې. مال کله جنرال کېږي؟ هغه راته ښه په زوره ـ زوره وخندل. ویل یې اول خو څو میاشتې وروسته او که‌نه یو کال وروسته حتماً جنرال کېږم. ما یې هم خبره ومنله؛ ځکه تره یې په اردو کې غټ چارواکی دی او دی نالوستی به هم څو کاله وروسته جنرال وي.

د نړۍ ځینې هېوادونه ملي شخصیتونه نه لري او له ډېرو وړو اشخاصو یې هم ملي او نړیوال شخصیتونه جوړ کړي دي. زموږ تاریخ د ملي شخصیتونو له ښو کارنامو ډک دی. احمد شاه بابا رحمه الله، میرویس نیکه، غازي وزیر محمد اکبر خان، ملا مشک عالم، سلطان محمود غزنوي، ملالۍ، نازو انا او لسگونه نور. د افغانستان حکومت اتلس ډوله مډالونه لري، چې ډېری یې د پورته اشخاصو په نامه جوړ شوي؛ خو له بده‌مرغه دغه ټول مډالونه اوس د زموږ د وژونکو او زموږ د وژونکو د پروژې تمویل کوونکو ته ورکول کېږي.

د کرزي او اشرف غني په اوولس کلنه واکمنۍ کې دغه مډالونه ډېری امریکايي، ناټو، اروپايي او ځینې اسیايي هېوادونو هغو مشرانو ته ورکړل شوې، چې دلته یې جگړه روانه ساتلې او زموږ د وژلو له‌پاره یې خپل عسکر رالېږلي دي.

احمد شاه بابا د هند فاتح، میرویس نیکه د گرگین قاتل او د افغانستان د ازادۍ اتل، وزیر محمد اکبرخان د مکناټن قاتل، سلطان محمود غزنوي د هند فاتح، ملالۍ د میوند د جگړې اتله او نازو انا د میرویس نیکه مور. دغو اشخاصو نه یوازې افغانستان له پردیو زورواکانو ساتلی و، بلکې د هندوستان پر لویه خاوره یې کلونه ـ کلونه واکمني کړې وه. خو اوس د دوی په نامه جوړي مډالونه هغه چاته ورکول کېږي، چې دلته یې خپل لاسپوڅي کېنولي او هغه خلکو ته ډېر مډالونه ورکول کېږي، چې دغه پلېت عسکرو پر وړاندې یې جگړه کړي وي او دوی یې شهیدان کړي وي. اشخاص بدلېږي او رابدلېږي؛ خو اشخاص باید د تاریخ له زوروې پرېکړې ځانونه وساتي؛ ځکه تاریخ پر هېچا رحم نه کوي او راتلونکي نسلونه سپین ویل پرېږدي. ولسمشر چې د ناروې سفیرې ته مډال ورکولی شي؛ نو زه هم یو مډال غواړم.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close