ولسمشر اشرف غني له چا سره د سولې خبرې کوي؟

« سرليکنه »
د تېرې شنبې په ورځ ، چې د روان کال د کب مياشتې اتمه کيده د کونړ په ولايت کې يوې درنې چاودنې تر ۱۴ پورې کسان ووژل او تر ۴۰زيات يې ژوبل کړل، د همدې ورځې په درې نيمو بجو د دفاع وزارت دروازې سره بله چاودنه هم وشوه ، چې دې چاودنې هم ۱۵ تنه ووژل او تر ۲۰ زيات يې ژوبل کړل. .
ولسمشراشرف غني له دواړو چاودنو، چې په يوه وځ وشوې سخته انديښنه وښوده او په خپله ويناکې يې دغبرګون په ښودلو وويل: د هغې ډلې سره، چې د ولس په وژلو کې لاس لري هېڅ وخت به ورسره خبرې ونه کړم يا هغه کسان، چې ولسي وګړي يې وژلي وي د سولې په اړه به ورسره خبرو ته حاضر نه شم .
د ولسمشر خبره د کاڼې کرښه ده او پرځای خبره ده ؛ خو کاش، چې ولسمشر تر پايه په خپله خبره ولاړ پاتې شي!
افغان مظلوم او کړيدلی ولس تل په دا ډول خبرو باور کړی دی تر اوسه پورې، چې پر افغان ولس د پرديو اهدافو د سرته رسولو جګړه تپل شويده او د خلاصون لار يې ترې نه ده موندلې.
په همدا ډول ویناو چې د مخه به ورته جهادي مشرانو د جهادي جذباتو په ښکاره کولو سره کولې او ولس به په خبره قرباني په خپله ايماندارۍ سره ورکوله تر نن ورځې پورې د ولس پرسر دبارودو اور بل ؛ خو د جهاد ثمره يې ونه ليده .
جهادي مشرانو به د اشرف غني په څير د ولس د جذباتو لپاره ويل: ترڅو ، چې يو کمونيست هم په افغانستان کې وي زموږ جهاد به جاري وي.
خو افسوس دهغې کمونيستي رژيم د غړو سره شريک حکموت د سياسي ګټو په نظرکې نيولو سره جوړشو افغان مسلمان اومتدين ولس ډير خوش باوره دی، اشرف غني ته که ووايي چې تاسې دهغه ډلې سره د سولې خبرې نه کوئ ، چې د ولس په وژنه کې لاس لري دا په حکومت کې درسره څوک دي؟
څوک به داسې پيداشي، چې ولسي وګړي يې وژلي نه وي ؟
څوک به پيداشي، چې دهېواد په ورانولو کې لاس نه لري ؟
ستاسې جناب اشرف غني!  په خوا و شا راټولو اشخاصو کې داسې څوک نشته، چې په زندانو کې يې ډله ييزې وژنې نه وي کړي ؟
بيا داسې څوک به په خپلو راټولو شوو اشخاصو کې پيداکړي، چې د خپل منځي جګړو او يا د نورو د اهدافو لپاره يې هېواد په کنډوالو نه وي بدل کړی؟
د څرخي پله به خواوشا په چنداول کې او د پلي ګون شهيدان د چا لخوا په ډله ييزه توګه ژوندي تر خاورو لاندې شول ؟
دا ولس دی چې د سردار داؤدخان، چې سره د۱۷ کورني غړو په کمونيستي کودتا کې ووژل شو دا چا و وژه ؟
تاسې خو اوس د سردار داؤد خان د مقبرې په جوړلو کې۲۰۰۰۰ شل زره ډالر د خپل جيب نه د لګښت اعلان کړی دی ؛ خو دا دې نه دي څرګند کړي چې د سردار داود خان قاتلان څوک ؟

او دهغوی سره خو هراړخيزې خبرې کوې!

د ولسمشر خبره د قدر وړ ده بايد د هغه چاسره د سولې خبرې ونشي، چې د ولس په وژنه کې لاس ولري ؛ خو لږ څه وړاندې هم  نظر پکاردی .

د افغان ولس لومړي قاتلان دې محاکمه کړل شي ، بيا ښه خبره ده د ولس د وژونکو ته دې هم د سولې خبره نه کوي!

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close