ولسي جرګه: کابل ښار کې د خلکو تښتونې او هدفي وژنو خلک اندېښمن کړي

(کابل ټکی کام، ۱۳۹۷، لړم ۱۷)

د افغانستان د ولسي جرګې د کورني امنيت د کمېسيون غړي په کابل کې د وروستيو هدفي وژنو او تښتونو په تړاو اندېښنه څرګنده کړې ده.

د دغه کمېسیون غړی صالح محمد صالح وايي، د کابل ښار امنیتي وضعيت تر دې حده خراب شوی چې خلک د خپلو کورونو مخې ته په نښه کېږي او د نامعلومه وسله والو له لوري ويشتل کېږي.

که څه هم نوموړی وايي، د دغه وژنو او تښتونو د زياتيدو له کبله امنيتي او کشفي ادارې ناغيړي کوي خو د کابل يو شمير ښاريان وايي چې په ډيری ورته ډول پېښو کې د امنيتي ادارو کارکوونکي لاس لري.

د صالح په خبره، د هدفي وژنو د مخنیوي لپاره دې امنيتي ارګانونو سره د لا زياتو امکاناتو مرسته وشي.

وړمه ورځ په کابل ښار په مدني فعال او شنونکي خيرالله شينواري د نامعلومه وسله والو له لوري د جړې او وسله وال برید وشو چې نوموړی پکې ټپي شو او له هغې څو ورځې مخکې د کابل پوهنتون پر استاذ او شنونکي فیض ځلاند هم له ورته برید سره مخ شوی و چې له پيښې روغ وتلی و.

دغه راز شاوخوا درې اوونۍ مخکې د ازادو سياليو لوبغاړی احمدولي هوتک هم خپل کور ته نږدې په يوه بريد کې ټپي شو.

تر اوسه د دغه بريدونو پړې چا په غاړه نه دي اخيستي.

د کابل ښار یو تن اوسېدونکی شمس الدين وايي، په ښار کې ډيری پېښې د امنيتي پوستو تر څنګ او نسبتاً امن سيمو کې شوي- کېږي او په دغسې پېښو کې امنيتي ادارې ککړې بولي.

له بله پلوه د کابل د امنيې قوماندانۍ وياند بصير مجاهد ادعا کوي چې د ورته ډول حملو د مخنيوي په اړه اقدامات کړي او په وروستيو کې يې له دوه سوه زیات کسان نيولي چې په ډله کې يې انسان تښتوونکي، غله او قاتلين هم شامل دي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close