ټاکنو شکاياتو کمېسيون: د حذف شويو نوماندانو لاريونونه او اعتراضونه ګټه نه لري

(کابل ټکی کام، ۱۳۹۷، زمری ۲۳)

د افغانستان د ټاکنو شکاياتو کمېسيون وايي، د ولسي جرګې د نوماندانو له نوملړه د ايستل شويو کسانو پريکړه يې وروستۍ ده او د هغوی د پيل کړيو لاريونونو او اعتراضونو پروا نه ورځي.

د دغه کمېسیون منشي علي رضا رحماني وايي، دغه کسان له په جرمونو تورن شوي نو ځکه يې نومونه له ياده نوملړه ايستل شوي زياتوي “د هغوی په اړه شوې پریکړه د ټاکنيزو شکاياتو کمېسيون وروستۍ پریکړه ده او د دوی پر نيوکو، اعتراضونو او لاريونونو نه شي بدليدای”.

د ټاکنيزو شکايتونو کمېسیون درې ورځې مخکې اعلان وکړ چې د نوماندانو له نوملړه يې پنځه دېرش کسان د نامسووله وسله والو په درلودو، د ځمکو د غصب او ځينو نورو جرمونو کې د ښکېلتيا له کبله ايستلي دي.

په عين حال کې د ايستل شويو کسانو له ډلې چې د ملاتره خيل، ضياءالحق امرخيل او اسدالله شريفي په ګډون يو شمير نورو ايستل شويو نوماندانو هم اعتراضیه غونډې او لاريونونه پيل کړي او ځينو يې تور پورې کړی چې د دوی د اجرائيه مشر ډاکټرعبدالله په امر له دغه ليسته ايستل شوي دي.

نن دوهمه ورځ ده چې د ملاتره خيل او ضياءالحق امرخيل پلويانو د کابل د ټاکنو کمېسيون دروازه تړلې او په مخکې يې خيمې درولې، دغه راز د اسدالله شريفي پلويانو نن د کابل- مزارشريف لاره تړلې وه او ګواښ وکړ که يې حکومت غوښتنو ته مثبت ځواب ورنه کړي دوی به په کابل او بلخ ولايتونو برېښنا پرې کړي.

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close