ټاکنې داسې وي؟/ هېواد ریان

دا چې د ولسمشرۍ، ولسي جرگې، ولایتي شورا او نورې ټاکنې په اسلام کې روا دي او یا نا روا پر دې موضوع به دیني عالمان خبرې وکړي؛ خو په افغانستان کې هر ځل ټاکنې په هر لحاظ شرمېدلي وي. د تېرې شنبې په ورځ له غزني او کندهار پرته نور د هېواد د ۳۲ ولایتونو په مرکزونو کې دوې ورځې ټاکنې وشوې، خو د پنځلس میلیونه رایه ورکوونکیو له ډلې یوازې یو میلیون خلکو هم په ټاکنو کې برخه وانه‌خیسته. عام خلک ورځ تر بلې په ټول اوسني نظام او ټاکنو بې‌باوره کېږي. دلته لوستی او نالوستی ټول وايي، چې دلته انتخابات نه، بلکې انتصابات کېږي او ولې خپل ژوند په خطر کې واچوي.

د ټاکنو په لومړۍ ورځ طالبانو د هېواد په گوټ ـ گوټ کې د ټاکنو مرکزونه په نښه کړل او د جگړو، نښتو او چاودنو له امله ځینې مرکزونه وتړل شول. طالبانو د هېواد په ځینو سیمو کې د نوماندانو صندوقونه، د ټاکنو کارکوونکي او نور وسایل هم ونیول او د هېواد مهمې لویې لارې یې هم تړلې وې. د شنبې تر مازیگره پورې ډېرو کمو خلکو په ټاکنو کې برخه واخیسته او د ټاکنو کمېسیون وروسته اعلان وکړ، چې یکشنبه دې هم د رایې اچونې مرکزونه پرانیستي پاتې شي، خو تېره ورځ بیا هم خلکو په ټاکنو کې برخه وانه‌‌خیسته او د دې پروژې په ناکامولو کې خلکو ښه اخلاص وکړ.

په ټوله کې د ولسي جرگې ټاکنې په هر لحاظ ناکامې وې. د درغلیو پراخ شتون، د خلکو نه گډون، د یوه ولایت صندوقونه بل ولایت ته لېږدول، د طالبانو بریدونه، د زورواکانو له لوري په زوره له خلکو د رایې غوښتنه او حتا داسې انځورونه هم خپاره شول، چې د رایې اچونې په مرکزونو کې کارکوونکي د لډو لوبه کوي او قرار ناست دي.

دا چې راتلونکې ولسي جرگې ته به بیا څوک بریالي کېږي، په دې ټول خلک پوهېږي، چې د ټاکنو په کمېسیون کې چارواکو ته څومره ډېرې پیسې ورکړې، ښه زور ولرې او څومره درغلي کولی شې، نو بریالي به هم هماغه خلک وي او په ډېر کم شمېر کې به داسې کسان هم بریالي شي، چې په رښتیا د خلکو په رایه راغلي وي.

نور خو خلک پوهېږي، چې دلته د خلکو د خوښې وړ کسان هېڅکله نه بریالي کېږي. هر لوستونکی دې خپل ولایت په نظر کې ونیسي، چې د ولایت څومره زورواکان، څومره غاصبین او څومره سر زوري خلک نوماندان شوي وو او د بریالیتوب چانس یې څومره دی؟ نور ټول افغانستان همداسې پرتله کړئ او بیا به خپله ووایئ، چې په رښتیا دلته ټاکنې نه وې، بلکې د زورواکانو زورازمايي کېدله.

د ټاکنو تر پایلو پورې…

په ټولنیزو شبکو کې ځینې نوماندان همدا اوس خپله بریا نمانځي. لا پوره رایې شمېرل شوي نه دي، خو دوی پوهېږي، چې بریا یې یقیني ده او د رایې شمېرنې کسانو جېبونه یې ور ډک  کړي او پردۍ رایې هم د ده په حساب کې ورزیاتوي.

د ټاکنو د پایلو د اعلان وروسته په ټول هېواد کې د گڼو لاریونونو اټکل به بې‌‌ځایه نه وي. دلته هر نوماند ځان بریالی گڼي او پلویان به یې بیا خلکو ته میاشتې ـ میاشتې سرخوږی پیداکړي او یا کېدای شي دغه ټاکنې بې‌پایلې اعلان شي او د ولسمشرۍ، ولسي جرگې او ولایتي شورا ټاکنې په یوه ورځ ترسره شي او که بل نظام راغی، نو د دغو خلکو ټولې هیلې به خاورې شي او په تش ډگر به پاتې شي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close