کابل ټکی کام (سه شنبه، ۲۸ لړم، ۱۳۹۸ل)
د “سنډې ټایمز” او بي بي سي “پاناراما” خپرونې پلټنې ښيي چې ۲۰۱۲م کال د اکتوبر مياشتې په ۱۸مه نيټه برتانوي عسکر جنايي جرمونه ترسره کړي دي.
پلټنې جوتوي چې د برتانیا د ځانګړو ځواکونو یوه تن د افغانستان د هلمند ولایت د
نادعلي ولسوالۍ په یوه کلي کې څلور تنکي زلمکي په ډزو ووژل.
افغان ګواهان د هغې شپې کیسه کوي چې ۱۲ کلن شاه محمد او ۱۴ کلن محمد طیب له ۱۷ کلن نېک محمد او د هغه له ۲۰ کلن ورور فاضل سره د شپې مېلمانه شول.
د شپې ۸ بجې برتانوي او افغان ځانګړو ځواکونه په “لوی باغ” کلي کې په یوه کور ننوتل او ټولې کوټې یې تلاشي کړې.
یو برتانوی سرتېری یوې کوټې ته ننوت او ډزې یې پیل کړې.
د دې هلکانو ورور سلطان محمد وايي: “کله چې کوټې ته ننوتم هر خوا د هغوی هډوکي او غاښونه پراته وو. دوی همالته پراته وو او شاوخوا ځايونه يې په وینو ککړ وو.”
مور یې، سبا تر لمرختو پورې کوټه کې د څلورو زامنو له په ډزو ويشتل شويو جسدونو سره ناسته وه. د هغې په وينا: “پیالې له وینو ډکې وې. هلکان یې پر سر ویشتلي وو.”
په سهار یې د هلکانو جسدونه بهر ته راویستل او جنازې یې د کلي په جومات کې کېښودې. په لوی باغ کې خبر خپور شو. عام باور دا و چې هلکان عام وګړي وو.
پخواني پوځي استخباراتي افسر او د جګړو کارپوه ‘فرانک لیډویج، وايي: “ځینو خلکو دغو چاپو ته شپني علمیات ویل. کېدای شي نور یې وژونکې ډلې وبولي. ترتیب یې داسې و چې ته به وتلې که دې هدف درلود او که نه. دا د وژنو یو نه درېدونکی وژونکی ماشین و.”
ملګري ملتونه دې نتيجې ته رسېدلي چې بهرنیو ځواکونو تر ۳۰۰ زیات وګړي ددغو شپنیو عملیاتو په څېر په شپنیو عملیاتو کې وژل شوي دي.
هغه انځورونه چې پاناراما ترلاسه کړي د کوټې پر خټین دېوال د مرمیو داغونه ښيي. ډېری مرمۍ له ځمکې دوه فوټه پاس لګېدلې چې د وژل شويو هلکانو د کورنۍ د خبرو پخلی کوي.
