په افغانستان کې د بلک‌واټر لوبه رسماً پیل شوه!/ هېواد ریان

هېواد ریان

بلک‌واټر د حرمونو امریکایانو یوه نظامي ډله ده. له ماشومتوبه بې‌پلاره او بې‌موره امریکایان دې ډلې ته بېول کېږي او د ځوانۍ تر وخته نظامي زده کړې ورکول کېږي. دوی داسې وحشیان روزل کېږي، چې ترحم او انسانیت په نامه هېڅ هم نه پېژني. دوی د مور، پلار، خور، ورور، نیا او نیکه مینه نه وي لیدلي او نه یې ټولنیز ژوند کړی وي، بلکې په قصدي ډول همداسې روزل کېږي، چې په هېچا رحم ونه کړي. د بلک‌واټر عسکرو ته د هر مسلمان ضد مفکوره ورکول کېږي او بیا په اسلامي هېوادونو کې داسې کارونه کوي، چې انسان یې یوازې په یادولو هم شرمېږي.

سږکال د دې ډلې مشر دوه ځلې افغانستان ته راغی او غوښتل یې د افغانستان جگړه خصوصي کړي. یعنې د امریکا دولت دغه جگړه بلک‌واټر ته وسپاري. د شمال ټلوالې سربېره جنرال رازق هم ورسره هوکړه کړې وه؛ خو د سختو غبرگونونو وروسته امریکا په ښکاره د دې اعلان نه په شا شوه.

افغانستان د تاریخ په اوږدو کې څلوېښت کلونه په سوله کې تېر کړي او نور ټول عمر یې نړیوالو ته جگړې گټلې. لویې امپراتورۍ دلته ړنگې شوې او هر هېواد چې دلته پښه ايښې، بیا داسې شرمېدلي وتلي، چې نسلونه ـ نسلونه یې به یاد ساتي. لویه برېتانه، شوروي اتحاد او اوس امریکا او نړیوال ملگري یې.

کله چې انگرېزانو د افغانستان خپلواکي په رسمیت وپېژنده، نو حبیب الله کلکاني یې راپورته کړ او د امان الله خان واکمنۍ ته یې د پای ټکی کېښود. ډیورنډ ۱۲۵کلنه لانجه تراوسه حل شوې نه ده او برېتانیې په لوی لاس د یوې ژبې ویونکي په دوو برخو ووېشل. هندوستان یې درې هېوادونه کړ او په هند کې یې مسلمانان اقلیت کړل.

د روسانو له وتلو وروسته، افغانان د روسانو له ښخ شویو ماینونو سره تراوسه مبارزه کوي. روسان چې ووتل، کابل په کورنیو جگړو کې په یوې کنډواله بدل شو. کافران په هر هېواد کې همدغه لوبه کوي او له هغه هېواده داسې نه وځي، چې وروسته یې خلک په خپلو کې سره ونه خوري.

امریکایانو عراق کوم حالت ته ورساوه؟ هلته د شیعه، سني او کُرد ترمنځ اوسنی واټن څومره دی؟ ایا کرُدستان د خپلواکۍ اعلان ونه کړ؟ ایا بغداد، موصل، بصره، کرکوک او نور ځایونه یې په رښتینو کنډوالو بدل نه شول؟

سوله او د امریکایانو وتل!

روانه میاشت د امریکا د بهرنیو چارو ځانگړي استازي زلمي خلیلزاد په قطر کې له طالب استازو سره درې ورځې خبرې وکړې. دا چې د دوی ترمنځ په کومو خبرو هوکړه شوې او امریکایانو د طالبانو کوم شرطونه منلي، تراوسه رسنیز شوي نه دي. خو د سکاټ مېلر او جنرال جوزیف ډانفورډ له خبرو داسې ښکاري، چې دوی نور له افغانستان وځي. دا چې امریکایان کله وځي او څنگه وځي دغه حقیقت به راتلونکی وخت روښانه کړي؟

امریکا په روان کې پر افغانستان ۵زره بمونه وورول؛ خو په جگړه کې یې کومه ښکاره لاسته راوړنه ترلاسه نه کړه. ۲۵۰سوه زره بهرني عسکر یې دلته وجنگول؛ خو بیا یې هم ماتې وخوړه. نیمه نړۍ یې له ځان سره ملگرې کړه؛ خو اوس د افغان عسکرو اړتیاوې هم نه شي پوره کولی.

د امریکایانو له وتلو سره سم، دلته د فاطمیون، داعش او نورو پټو او ښکاره وسله‌والو ډلو د شتوالي اعلانونه کېږي. یا په قصدي ډول داسې خبرو ته د خلکو ذهنونه چمتو کوي او یا دغه ډلې تیارې روزل شوې او د امریکایانو له وتلو وروسته به د جګړې ډگر ته راښکته کېږي.

د بلک‌واټر دغه دویمه بڼه به مسجدونه، عامه ځایونه، روغتونونه، ښارونه، ښوونیز مرکزونه او د گڼې گوڼې ځایونه وي او مسوولیت به یې هېڅوک هم نه مني. د دې خبرې ښه ثبوت د کابل د سې شنبې ورځ برید دی، چې یوازې دیني عالمان پکې په نښه شول او مسوولیت یې تراوسه چا ونه مانه. یعنې د بلک‌واټر لوبه اوس رسمي پیل شوه او څو چې امریکایان وځي، نو دوی به دلته د وینو سېلابونه روان کړي وي او د دې ټولو مسوولیت به د اوسني حکومت پر غاړه وي. ځکه اوسنی حکومت له امریکا سره ستراتېژیک تړون لري او په لوی لاس یې امریکایانو ته د داسې لوبو زمینه برابره کړې ده. اشرف غني او عبدالله یوازې د واک ساتلو لپاره هرې ناروا ته غاړه ايښې او هر ذلالت ته یې سرونه ټیټ کړي دي.

ټېګونه

اړوند مطالب

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close